«Հայկական ժամանակ». Արծվիկ Մինասյանը վստահ է, որ իրենք ոչինչ չեն խախտել

Վաղը ԱԺ էթիկայի հանձնաժողովը քննարկելու է ԲՀԿ-ական պատգամավոր Կարո Կարապետյանի դեմ ներկայացված դիմումը։

Ըստ որոշ տեղեկությունների, չի բացառվում, որ դիմումը մերժվի։ Թե երբ կքննարկվի դաշնակցական պատգամավոր Արծվիկ Մինասյանի եւ ՀՀԿ-ական Էդուարդ Շարմազանովի դեմ ներկայացված դիմումը, դեռ հայտնի չէ։ Վերջիններիս դեմ դիմումը ներկայացվել է PINK հասարակական կազմակերպության կողմից՝ երեւանյան DIY ակումբի պայթեցման հետ կապված նշված երկու պատգամավորների արած հայտարարությունների առնչությամբ։ Իր դեմ ներկայացված դիմումի վերաբերյալ Արծվիկ Մինասյան թերթի հետ զրույցում ասել է հետևյալը. «Իսկապես Էթիկայի հանձնաժողովում ստացվել է դիմում ՝ ԱԺ կանոնակարգ-օրենքով նախատեսված էթիկայի կանոն խախատման մեղադրանքով՝ հնչեցված իմ և պատգամավոր Էդուարդ Շարմազանովի հասցեին: Չեմ ուզում խոսել այն պատճառի կամ երևույթի մասին, որը հիմք է հանդիսացել նման դիմումի այդ հասարակական կազմակերպության կողմից, բայց կարծում եմ, նմանատիպ կազմակերպություններին ինչքան անտեսենք, այնքան ավելի լավ, որովհետեւ նման հասարակական կազմակերպությունները ոչ թե իրական արժեքներ ստեղծող, այլ ավելի շատ սեփական եկամուտները (հատկապես արտասահմանյան կառույցներից եւ անձերից) մեծացնելու ձգտմանն ուղղված գործողություններ են նախաձեռնում: Իսկ այն առիթը կամ թեման, ինչի վերաբերյալ նրանք փորձել են բողոք ներկայացնել, ևս մեկ անգամ փաստում և վկայում է, որ որևէ առնչություն ազգային արժեքների պահպանման, զարգացման հետ նրանք չունեն: Ինչ վերաբերում է էթիկայի հանձնաժողովի գործխունեությանը, վստահ եմ, որ օրենքով նախատեսված կարգով հանձնաժողովը քննության կառնի այդ դիմումը:

Մի բան կարող եմ վստահ ասել, որ թե Շարմազանովը, թե ես ոչ միայն չենք խախտել սահմանադրական որևէ նորմ, այլև ուղիղ շարժվել ենք հենց Սահմանադրությամբ նախատեսված պատգամավորի խղճի, համոզմունքի և սեփական կարծիքը հրապարակավ արտահայտելու մոտեցումից: Եվ եթե դատենք այդ հասարակական կազմակերպության և նրա աջակիցների դատողությամբ, ապա առնվազն ԱՄՆ նախագահի թեկնածու Ռոմնին պետք է արդեն դատապարտված լիներ ցմահ ազատազրկման»: