Իրանցի վարորդները փորձել են շրջանցել ՀՀ մաքսային օրենքները

Պետական եկամուտների կոմիտեի նախաբացթողումային հսկողության վարչության աշխատակիցներն օրերս «Ապավեն Տերմինալ» մաքսային հսկողության տարածքում ՀՀ ներմուծված վառելիքը տեղափոխող 5 ցիստեռն-ավտոմեքենաների արտաքին նախնական զննման արդյունքում պարզել են, որ ակնհայտ տարբերություն կա Մեղրիի մաքսակետում հայտարարագրված և առկա բեռի միջև:

Վարչության աշխատակիցները պարզել են, որ եռակցման միջոցով ավտոմեքենաների վրա ստեղծվել է վառելիքի արհեստական արտահոսք' հատուկ տեղադրված ճկախողովակի միջոցով: Չնայած իրանցի վարորդները փաստի վերաբերյալ սկզբում իրարամերժ բացատրություններ են տվել, պատճառաբանելով, թե իբր մեքենայի առկա պահեստային ջուրն օգտագործելու նպատակով են դիմել նման հնարքի, սակայն, ի վերջո, խոստովանել են, որ մաքսային վճարներից խուսափելու նպատակով են վառելիքը վերցրել վաճառքի:

Մաքսային կանոնների խախտման նմանատիպ մեկ այլ դեպք էլ նախաբացթողումային հսկողության վարչության աշխատակիցները կանխել է Սյունիքի տարածաշրջանային մաքսատանը:

Իրանից ներմուծված ավելի քան 41 տոննա ընդհանուր քաշով դիզելային վառելիքը տեղափոխող ավտոմեքենայի արտաքին նախնական զննման ժամանակ հայտնաբերվել է, որ ավտոմեքենայի մաքսային ապահովման միջոցներից մեկը պոկված, սակայն' խնամքով քողարկված է: Այս դեպքում էլ պարզվել է, որ բեռի ընդհանուր քաշը շուրջ 2 տոննայով պակաս է: