Գերմանիայում կհիմնվի առաջին իսլամական բանկը

Գերմանիայում կբացվի առաջին իսլամական բանկը, որի աշխատանքները կանոնակարգվելու են շարիաթի օրենքներով, գրում է The Financial Times Deutschland-ը։

Թուրքական Kuveyt Turk ներդրումային հիմնադրամը  պատարստվում է հոկտեմբերին դիմել Գերմանիայի ֆինանսների նախարարությանը նոր մասնաճյուղ բացելու պահանջով։

Kuveyt Turk-ը մտադիր է բանկ բացել Գերմանիայի ֆինանսական կենտրոն համարվող Ֆրանկֆուրտում։ Հետագայում ծրագրվում է նոր մասնաճյուղեր բացել Գերմանիայի մյուս մուսուլմանաշատ բնակավայրերում, հատկապես Բեռլինում։

Իսլամական բանկերում արգելված է տոկոսներ գանձել։ Նման դեպքերում, եթե հաճախորդը ուզում է ապառիկով տուն գնել, ապա շարիաթի օրենքներով աշխատող բանկը պարզապես գնում է այդ տունը, իսկ հետո հավելավճարով վաճառում հաճախորդին։

Ավելի վաղ Kuveyt Turk-ը պատրաստվում էր բանկ հիմնել Մանհեյմում, սակայն նրան այդպես էլ չի հաջողվել գերմանական իշխանություններից լիցենզիա ստանալ, այդ իսկ պատճառով այնտեղ գործում է փոքրիկ մասնաճյուղ, որը զբաղվում է միայն Թուրիքա փոխանցումներով։