Նավթի համաշխարհային գները նվազել են

Այսօր՝ օգոստոսի 30-ին, նկատվել է նավթի համաշխարհային գների զգալի նվազեցում, այն բանից հետո, երբ ԱՄՆ էներգետիկայի նախարարությունը հայտնել է նավթի պահուստների մեծացման մասին:

Այսօր առավոտյան ամերիկյան թեթև նավթի՝ WTI (Light Sweet Crude Oil)-ի հոկտեմբերյան ֆյուչերսների գները նվազել են $0.45-ով կամ 0.47%-ով՝ մեկ բարելի դիմաց կազմելով $95.04: Հյուսիսծովյան Brent տեսակի նավթի հոկտեմբերյան ֆյուչերսների գները չեն փոփոխվել և մեկ բարելի դիմաց կազմել են $112.54:

ԱՄՆ-ի առևտրային նավթի պաշարները (բացառությամբ ռազմավարական նշանակության պաշարների) մի շաբաթվա ընթացքում ավելացել են 3,778 մլն բարելով կամ 1%-ով՝ հասնելով մինչև 364,524 մլն բարելի: Վերլուծաբանները, ընդհակառակը, սպասում էին նավթի պաշարների նվազեցումներ մինչև 0.6% կամ 2 մլն բարել:

Նավթի գների նվազեցումները կապված է նաև ներդրողների՝ «Իսահակ» փոթորկի վերաբերյալ մտավախությունները: Սիդնեյի CMC Markets-ի վերլուծաբան Ռիք Սփուները Bloomberg գործակալության հետ ունեցած հարցազրույցում հայտնել է, փոթորկի պատճառով փակվել էին մի քանի նավթ արդյունահանող կետեր, սակայն փոթորիկը լուրջ վնասներ չի հասցրել:

Նավթի գների նվազմանը նպաստել են նաև ԱՄՆ-ի առևտրի նախարարության տնտեսական վերլուծության բյուրոյի հայտարարած տվյալները:

Այսօր հայտնի է դարձել, որ 2012թ.-ի երկրորդ կիսամյակում, առաջին կիսամյակի համեմատ, երկրի ՀՆԱ-ի իրական աճը, ըստ երկրորդային գնահատման, կազմել է 1.7%: ՀՆԱ-ի առաջնային հաշվարկները կազմել էին 1.5%: Ստացված իրական արժեքները համընկնում են վերլուծաբանների կանխատեսումների հետ: