Որքա՞ն կկազմի աջակցությունն այն ընկերություններին, որոնք պահպանել են աշխատակազմի ավելի քան 70 տոկոսը

Առաջին միջոցառումը, որը 23-րդն էր, վերաբերում էր զբոսաշրջությանն առնչվող երեք հիմնական՝ հանրային սննդի, գիշերակացի ու առողջարանային ծրագրերի ու զբոսաշրջության գործակալությունների ոլորտներում գործող ընկերությունների աջակցությանը: Մենք քննարկումներ ենք ունեցել նրանց հետ և եկել այն եզրակացության, որ նշված կազմակերպությունները խնդիրներից մեկը համարում են անձնակազմի ու աշխատակազմի պահպանումը, որովհետև տարբեր ոլորտներում վերջին երկու ամիսներին, նախորդ տարիների համեմատ, տնտեսական ակտիվության ցուցանիշը չի գերազանցում նախորդ տարիների նույն ժամանակահատվածի 50 տոկոսը: Այս մասին այսօր հրավիրված ասուլիսին ասաց էկոնոմիկայի նախարար Տիգրան Խաչատրյանը՝ «ՀՀ էկոնոմիկայի նախարարության կողմից մշակված տնտեսական աջակցության նոր ծրագրերը» թեմայով:

Խաչատրյանը նշեց, որ աջակցությունը կկիրառվի այն կազմակերպությունների նկատմամբ, որոնք ստեղծվել են մինչև 2020թ-ի մարտի 31-ը: Նախարարությունը խթանում է այն կազմակերպությունների գործունեությունը, որոնք շարունակել են պահպանել աշխատակազմի ավելի քան 70 տոկոսը, նրանք կստանան աջակցություն յուրաքանչյուր 3-րդ աշխատողի աշխատավարձի սուբսիդավորման չափով կամ աշխատավարձի ֆոնդի 33 տոկոս չափով:

Նրանք, ովքեր չեն պահպանել ավելի քան 70 տոկոսը, կստանան աշխատավարձի ֆոնդի 25 տոկոսի չափով աջակցություն, իսկ ովքեր չեն պահպանել աշխատողների 50 տոկոսից ավելին, չեն կարողանա օգտվել աջակցությունից: