Հեղափոխական մարզպետների «սայթաքումը»

Հեղափոխությունից անմիջապես հետո Նիկոլ Փաշինյանը հայտարարեց՝ հեղափոխությունը մարզեր տանելու անհրաժեշտության մասին: Այդ բարդ գործը պետք է իրականացնեին ՔՊ-ական նորանշանակ մարզպետները, որոնց լիազորել էին նաև մարզպետարաններում ֆինանսական աուդիտ անցկացնել և վեր հանել նախկին թալանչի մարզպետների ապօրինությունները: Հասկանալի է, որ աուդիտի համար ժամանակ է պետք, սակայն, մյուս կողմից էլ անցել է շուրջ երկու տարի և հասարակության համար հասկանալի չէ՝ նախկին մարզպետները ի վերջո թալանչի էին՞, թե՞ ոչ: 

Երկու տարին լուրջ ժամանակահատված է և այս ընթացքում պետք է որ ի հայտ եկած լինեին աղաղակող բացահայտումներ այն մասին, թե ինչպիսի աստղաբաշխական գումարներ են յուրացվել Հայաստանի մարզպետարաններում՝ թալանչի մարզպետների մասնակցությամբ: Սակայն նրանց հեղափոխական հետնորդները լուռ են և դա բազմաթիվ հարցեր է առաջացնում: Եթե աուդիտներ անցկացվել են և վեր չեն հանել խախտումներ, ապա ովքե՞ր են պատասխան տալու ՀՀԿ-ական նախկին մարզպետներին զրպարտելու համար:

Եթե աուդիտ չի անցկացվել, կամ անցկացվել է սակայն արդյունքները հանրությունից թաքցնում են սա էլ իր հերթին մտածելու տեղիք է տալիս, քանի որ տպավորություն է ստեղծվում, որ վերը նշված թալանչիների հետ հեղափոխականները եկել են լռակյաց համաձայնության և որոշել են հայտնաբերած խախտումները ջրի երես չհանել: Սակայն կա ևս մեկ տարբերակ, թե ինչու մինչ օրս հանրությանը չեն ավետում սենսացիոն բացահայտումների մասին: Այն է՝ դրանք պահում են հարկ եղած ժամանակ օգտագործելու նպատակով, ասել է թե՝ շանտաժի: Ինչպես տեսնում ենք՝ նկարագրված տարբերակներից և ոչ մեկը չի բխում հեղափոխական իշխանությունների շահերից…