«Առավոտ». Նախագահական ընտրություններից առաջ մոռացության մատնել «Հարսնաքարի» միջադեպը

«Առավոտ»-ը «Վահե Ավետյան» նախաձեռնող խմբի անդամ Լարիսա Ալավերդյանի հետ զրույցում հետաքրքրվեց' ի՞նչ փուլում է հանրային արդարության տրիբունալի ստեղծման գործընթացը, որի մասին երկու օր առաջ հայտարարեցին նախաձեռնող խմբի անդամները: Տիկին Ալավերդյանը պատասխանեց. «Սկսում ենք քննարկումներ նաև «Հարսնաքարի» բոլոր մեղավորներին պատասխանատվության ենթարկելու նախաձեռնող խմբի երիտասարդ ներկայացուցիչների հետ: Պարզապես մեխանիզմը դեռ չօգտագործված մեխանիզմ է, և մենք կարծում ենք, որ քննարկումները կշարունակվեն, և բոլոր շահագրգիռ կազմակերպությունների հետ կարող ենք ֆորումի նման մի բան ստեղծել: Մեր համակարգը առանց այն էլ վտանգների ներքո է հայտնված և պետք է թույլ չտալ, որ լրիվ կրիմինալ գործառույթներ իրականացնող համախմբված անձանց համակարգի վերածվի»:

«Առավոտ»-ը Լ. Ալավերդյանին խնդրել է գնահատել այն փաստը, որ կողմերի միջնորդությունը' Ռ. Հայրապետյանին որպես մեդադրյալ գործի քննությանը ներգրավելու մասին, մերժվեց:

Տիկին Ալավերդյանը պատասխանել է. «Ես ուզում եմ գնահատական տալ գործընթացի հապճեպության առումով, ինչը արժանի է ոչ միայն իրավական, այլև քաղաքական գնահատականի: Միջնորդությունները անպատասխան թողնելով՝ դատախազության կողմից այդ հապճեպությունը, դատարան հանձնելու գործընթացը հստակ ունի այնպիսի գծեր, որոնք խոսում են օրենքի կոնկրետ հոդվածների խախտումների մասին: Արի ու տես, որ արդար դատաքննություն չի արվում: Դա էլ առիթ է ծառայում ասելու, որ այդ հարցը իշխանությունը, տվյալ դեպքում' իրավապահ մարմիններն ու դատախազությունը քաղաքականացնում են»:

Թերթը հետաքրքրվեց՝ ըստ Լ. Ալավերդյանի՝ ո՞րն է նման շտապողականության պատճառը: Նա պատասխանեց. «Բոլոր դեպքերում այդ զարհուրելի, սարսափազդու հանցագործությունը մոռացության տալու, ավելի շուտ սկսելու, արագ ավարտելու միտում է նկատվում իրավապահների կողմից: Կարծում եմ, որ դա արվում է նրա համար, որ դատավճռի հայտարարման և նախագահական ընտրությունների միջև ընկած ժամանակահատվածը մեծ լինի: Հայ հասարակությունը ապացուցել է, ինչքան է ինքը հանդուրժողական և մոռացկոտ, այսպիսի դաժան դեպքերի վերաբերյալ ներողամտությունը ավելին է, քան պահանջը»: