«Առավոտ». Ընտրակաշառք չի՞ եղել

Երեկ ԲՀԿ անդամ Արմեն Մաթևոսյանը դատարանում ընդունեց իր մեղավորությունը, որ ինքը Աժ ընտրություններից առաջ ընտրակաշառք է բաժանել ու ստիպել Երևանի մի քանի բնակիչների քվեարկել «Բարգավաճ Հայաստան» կուսակցությանը: «Առավոտի» հետ զրույցում հարցին, թե ինքը որքա՞ն պատիժ է ակնկալում ստանալ այդ հանցագործության համար՝ պատասխանեց. «Ինձ թվում է՝ մեղմ կլինի ամեն ինչը»: Թե մեղմ ասելով՝ ի՞նչ նկատի ուներ ԲՀԿ-ականը՝ նա չասաց. «Ես չգիտեմ, վափշե գաղափար չունեմ»:

«Առավոտ»-ը հետաքրքրվեց՝ ընտրակաշառք բաժանելու հարցում ի՞նչ դեր է ունեցել ԲՀԿ-ն, կուսակցությունը չի՞ սատարել, նա վստահեցրեց. «Չէ, ես ինձնով եմ արել, ինչ արել եմ»: Թերթը ճշտեց՝ ուղղակի ուզել եք Ձեր գրպանից ընտրակաշառք բաժանելով սատարե՞լ հարազատ կուսակցությանը' նա պատասխանեց. «Այո»: ԲՀԿ-ականը նշեց, որ բացի ընտրակաշառք վերցնելու համար «բռնված» բնակիչներից, ինքը այլ մարդկանց ընտրակաշառք չի բաժանել:

Ուշագրավ է, որ չնայած Արմեն Մաթևոսյանն ընդունել է իր մեղավորությունը, սակայն գործով վկա ճանաչված բնակիչներից մեկը՝ Ծովինար Կոստանյանը, թերթին վստահեցրեց, որ ինքը Արմեն Մարտիրոսյանին ոչ տեսել է, ոչ ճանաչում է, ոչ էլ նրանից ընտրակաշառք է վերցրել. «Դա ընտրակաշառք չի եղել, օգնություն է եղել, դիմում ենք գրել ԲՀԿ-ին, 10 հազար դրամով օգնել են»: