Մանվել Գրիգորյան. Մեր ձեռքբերումներն ու նվաճումները Արցախի Հանրապետության վաստակած խաղաղությունն է

ՀՀ ԵԿՄ նախագահ, Արցախի հերոս, Գեներալ-լեյտենանտ Մանվել Գրիգորյանը շնորհավորական նամակ է հղել ԼՂՀ նախագահ Բակո Սահակյանին.

Մեծարգո նախագահ

ԼՂՀ անկախության հռչակման 21-ամյակի կապակցությամբ շնորհավորում եմ Ձեզ եւ ողջ արցախահայությանը:

Հայ ժողովրդի արցախյան հատվածը երկար է պայքարել անկախության եւ ինքնուրույնության համար: Պայքարել է եւ իր զավակների կյանքի ու սխրանքների գնով հաղթել: Արցախի հերոսական ժողովուրդը, Արցախի հերոսներ ծնող հերոս մայրերը իրենց զավակների կյանքի, առողջության ու անձնազոհության գնով հասել են իրենց նպատակին: Նպատակ, որն եղել է Արցախի բոլոր սերունդների երազանքը:

Մեր ձեռքբերումներն ու նվաճումները անկախ Արցախի Հանրապետության վաստակած խաղաղությունն է, կայացած բանակը, անկախացած եւ իր ապագան ինքնուրույն կերտող ժողովրդավարական նոր հասարակությունը: Հասարակություն, որն այլեւս իր երկիրը չի պատկերացնում այլ կերպ, քան անկախ եւ ինքնուրույն:

Լեռնային Ղարաբաղի Հանրապետության անկախության 21-ամյակի առթիվ՝ Հայաստանի Հանրապետության երկրապահների, 5-րդ բրիգադի մարտիկների, երիտասարդ եւ պատանի երկրապահների, հայրենական պատերազմի վետերանների, մտավորականների, զոհված ազատամարտիկների հարազատների մասնակցությամբ ուխտագնացությունն ազատագրված հայրենիք' խոնարհումի ու փառավորման առաքելություն է իրենց կյանքի ու առողջության գնով հողն ազատագրածների հանդեպ, այս հողի վրա այսօր ապրողների հանդեպ ու նրանց հանդեպ, ովքեր իրենց դպրոցական առաջին զանգի մեջ տեսնում են իրենց երկրի ապագան:

Մենք' երկրապահներս, չափազանց կարեւորում ենք Լեռնային Ղարաբաղի Հանրապետության կայունությունն ու մեր ժողովրդի բարօրությունը եւ մշտապես պատրաստ ենք կանգնել ձեր կողքին: Երկրապահի առաքելությունը միշտ էլ նույնացվում է Արցախի անկախության հետ: Այս առաքելությամբ են գործել եւ գործում են երկրապահի բոլոր սերունդները:
Ես հավատում եմ Արցախի ժողովրդի անկոտրում կամքին, Արցախի սահմանները պաշտպանող զինվորներին եւ Արցախի հերոս մայրերին:
Ցանկանում եմ Ձեզ ու ողջ արցախահայությանը' խաղաղություն եւ հաջողություն' ԼՂՀ միջազգային ճանաչման ու Արցախի ժողովրդի ապագայի կերտման հարցում:

ՀՀ ԵԿՄ ՎԱՐՉՈՒԹՅԱՆ ՆԱԽԱԳԱՀ,
ԱՐՑԱԽԻ ՀԵՐՈՍ,
ԳԵՆԵՐԱԼ-ԼԵՅՏԵՆԱՆՏ' Մ. Ս. ԳՐԻԳՈՐՅԱՆ