Մանվել Գրիգորյանը՝ «Գիտելիքի օրվա» կապակցությամբ

Ստորև ներկայացնում ենք ՀՀ ԵԿՄ նախագահ, Արցախի հերոս, Գեներալ-լեյտենանտ Մանվել Գրիգորյանի շնորհավորական նամակը՝  «Գիտելիքի օրվա» կապակցությամբ:

Հարգելի ուսուցիչներ
Սիրելի երեխաներ եւ ուսանողներ

Շնորհավորում եմ ձեզ սեպտեմբերմեկյան տոնի' «Գիտելիքի օրվա» կապակցությամբ: Ցանկանում եմ ձեզ հետաքրքիր ու բեղմնավոր ուսումնական տարի:

Առանձնահատուկ շնորհավորում եմ բոլոր նրանց, ովքեր Հայաստանի եւ Լեռնային Ղարաբաղի Հանրապետությունների անկախության հռչակման 21-ամյակի տարում հաճախում են առաջին դասարան, ում համար դպրոցի զանգը հնչում է առաջին անգամ:

Սիրելի դպրոցականներ

Ուզում եմ քաջ գիտակցեք, որ այսօրվա կապույտ երկինքն ու խաղաղությունը, անկախ եւ ազատ ապրելու ձեր իրավունքը, ձեռք են բերվել նաեւ ձեր հայրերի, պապերի կամ մերձավորների կյանքի ու արյան գնով, հերոսության ու խիզախության շնորհիվ: Եվ դուք այսօր պետք է տեր կանգնեք մեր հայրենիքին' լավ սովորելով ու սերտելով հայրենասիրության դասերը: Դուք մեր երկրի ապագան եք, իսկ ապագայի ամուր հիմքերը դրվում են դպրոցում, որտեղ ձեզ սպասում է սեփական երկրի պատմության ու մշակույթի յուրացման մի նոր ժամանակաշրջան:

Բարի երթ ձեզ դեպի դպրոց, սիրելի երեխաներ:

Սիրելի ուսանողներ, դուք ոտք եք դրել մասնագիտական բարձրագույն կրթություն ստանալու ձեր երազանքի շեմին:
Մաղթում եմ ձեզ աշխատասիրություն եւ ուսումնատենչ ոգի: Ես հավատում եմ, որ դուք կհարստացնեք մեր երկիրը տարբեր ուսմունքների խոր եւ հիմնավոր յուրացմամբ:

Բարի գալուստ եւ հաջողություն առաջին կուրսեցիներին, որ ուսման մեջ արդարացնեն իրենց ծնողների ու հարազատների ուրախությունը:

Մեր հայրենիքի անկախության հռչակման 21-ամյակի առթիվ մաղթում եմ ողջ հայ ժողովրդին, որ նրա նոր սերունդը' լինի ավելի կիրթ, գիտուն, մարդկային ու հայրենասեր, որ կարողանա, ավելի ճշգրիտ իմաստավորի անցյալը, տեր կանգնի ներկային եւ ավելի իմաստուն կերպով կանխատեսի գալիքը: Լինել մարդ, հայրենասեր, մասնագետ. ահա այն երեք հենասյուները, որոնց վրա կարող է ամուր կանգնել մեր գալիքի շենքը:

Եվս մեկ անգամ շնորհավորում եմ բոլորիդ եւ մաղթում նորանոր հաջողություններ:

ՀՀ ԵԿՄ ՎԱՐՉՈՒԹՅԱՆ ՆԱԽԱԳԱՀ,
ԱՐՑԱԽԻ ՀԵՐՈՍ,
ԳԵՆԵՐԱԼ-ԼԵՅՏԵՆԱՆՏ' Մ. Ս. ԳՐԻԳՈՐՅԱՆ