ՀՀԿ-ի կենտրոնական գրասենյակից դուրս եկած երիտասարդները դեռ ո՞ղջ են

Օրեր առաջ hամացանցում հայտնվել է լուսանկար, որում երևում է, որ «Հանրապետական կուսակցության» կենտրոնական գրասենյակից սպորտային հագուստով դուրս են գալիս երկու անձինք: Այս ամենից հարց է առաջանում. ՀՀԿ կենտրոնական գրասենյակ սպորտային համազգեստով մուտքը թույլատրվում է, իսկ նույն կուսակցության խորհրդի անդամ, դեռևս ԱԺ պատգամավոր Ռուբեն Հայրապետյանին պատկանող ռեստորանային համալիր՝ ո՞չ: 

Կարելի է պատճառաբանել, որ տվյալ ռեստորանային համալիր չի կարելի մտնել սպորտային հագուստով, սակայն իշխող կուսակցության կենտրոնական գրասենյակ կարելի է: Մի՞թե դա ավելի նվազ պաշտոնական վայր է: Իհարկե ո՛չ: Ուղղակի այս ամենը հստակորեն արտացոլում է երկրում տիրող քրեաօլիգարխիկ համակարգի պատկերը ու այն արժեքային համակարգը, որով առաջնորդվում է իշխանական վերնախավը:

Այստեղ գործում է ընտանիքի կեղծ գախափարախոսությունը, որն այսօր պարտադրվում է մեր հանրությանը, և նեղ խմբային շահերը: Կարճ ասած՝ «օջախի սրբության գաղափարն» է, այսինքն՝ «Ո՞վ կարա մտնի մեր օջախ ու իրեն լավ չպահի»:Սակայն այս գաղափարը դեռևս լիարժեք ձևավորված չէ, ու ընտանիքի և այդ ընտանիքների միջև հարաբերությունները կարգավորող համակարգը ձևավորված չէ։ Այստեղ ամենակարևորը հարաբերությունների հստակեցումն է, որը պետք է ցույց տա, թե ինչպես պետք է գործել խմբային շահերին վնաս չպատճառելու համար։ Այս ոչ կարգավորված իրավիճակն էր, որի պատճառ դառձավ «Հարսնաքար»–ի դեպքը և հանգեցրեց նրան, որ Սերժ Սարգսյանը «գեղեցիկ չի» եղանակով Ռուբեն Հայրապետյանին դուրս հրավիրեց ԱԺ–ից։ Գնաց այս քայլին, որովհետև վերջինս վնասել էր միասնական համակարգի հեղինակությանը։ Ու այս դեպքում մեզ մնում է հուսալ, որ համակարգի հայրիկի խրատը ազդել է «մեծ ընտանիքի» մյուս անդամների վրա կամ իրենց մոտ ՀՀԿ կենտրոնական գրասենյակը որպես «մեր օջախ» չի ընկալվել և «ոչ հարիր» հագուստով ՀՀԿ գրասենյակ մտած երիտասարդները ողջ են։ 

Լուսանկարը՝ Սոնա Բարսեղյանի, News.am

Սևակ Մամյան