Ավանդական օրհնության կարգ Մայր Աթոռ Սուրբ Էջմիածնում

Գիտելիքի օրվան ընդառաջ Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հանդիսապետությամբ տեղի է ունեցել կրթության ոլորտի ներկայացուցիչների օրհնության ավանդական արարողությունը: Միջոցառմանը մասնակցել են ՀՀ կրթության և գիտության նախարար Արմեն Աշոտյանը, ՀՀ բուհերի ռեկտորներ, դպրոցների, քոլեջների, ուսումնարանների և մանկապարտեզների տնօրեններ, ինչպես նաև հանրակարթական դպրոցների աշակերտներ:

Եկեղեցական արարողակարգից հետո Ն.Ս.Օ.Տ.Տ. Գարեգին Բ Ամենայն Հայոց Կաթողիկոսին ու ՀՀ կրթության և գիտության նախարար Արմեն Աշոտյանը պատասխանել են լրագրողների հարցերին:

«Մենք բարձր գոհություն ենք բարձրացնում առ Աստված, որ ձևավորվել է այս գեղեցիկ ավանդույթը և տարիներ ի վեր կրթության մշակները առաջնորդությամբ Հայաստանի Հանրապետության կրթության և գիտության նախարարի, գալիս են Սուրբ Էջմիածին՝ իրենց ուխտը վերանորոգելու հայ դպրության և կրթական մշակների հիշատակի առջև»,- լրագրողների հետ հարցուպատասխանի ժամանակ նշել է Գարեգին Բ Ամենայն Հայոց Կաթողիկոսը և հավելել,-«Մենք համատեղ աղոթքով հայցում ենք աստվածային Սուրբ հոգու շնորհները, որպեսզի կրթական մշակները զորացած իրենց պատասխանատու, կարևոր, հայրենաշեն և եկեղեցաշեն առաքելությունը իրականացնեն կրթական օջախներից ներս՝ դաստիարակելով արժանավոր զավակներ ազգի, հայրենիքի և մեր Սուրբ Եկեղեցու համար: Մենք մեր աղոթքը առ Աստված բարձրացրեցինք՝ խնդրելով, որ Տերը իր աջը պահապան և օգնական դարձնի հայ կրթության գործի մշակներին և արգասավորի նրանց ջանքերը ի սեր հայրենիքի զորացման և նրա բարօր կյանքի առաջընթացի»:

ՀՀ կրթության և գիտության նախարար Արմեն Աշոտյանը, կարևորելով եկեղեցու դերակատարումը կրթության համակարգում, նշել է. «Ազգային դպրոցը և արժեհամակարգ ունեցող քաղաքացու ձևավորումը դժվար է պատկերացնել առանց Հայ Առաքելական Եկեղեցու հետ համագործակցության և քրիստոնեական բարոյագիտության: Դարեր շարունակ, երբ հայ ժողովուրդը չուներ պետականություն, կրթության լույսը տարածելու ծանր առաքելությունը ստանձնել էր Հայաստանյաց Առաքելական Եկեղեցին: Անկախության պետականության ստեղծումից հետո կրթական համակարգում ավանդույթներին ու արմատներին հավատարիմ մնալը խիստ առաջնային խնդիր եմ համարում: Եկեղեցու դերը շատ կարևոր է, քանի որ կրթության գլխավոր առաքելությունը գիտելիք հաղորդելուն զուգահեռ ինքնության պահպանման և արժեհամակարգի ձևավորման խնդիրն է»: Նախարարը ընդգծել է, որ եկեղեցու հետ համագործակցությունը ոչ միայն բարոյական,այլև իրավական հարթության խնդիր է, քանի որ հայ ինքնության պահպանման առումով Հայաստանյաց Առաքելական Եկեղեցու բացառիկությունը շեշտված է նաև ՀՀ Սահմանադրության մեջ: