Իշխանությունները փոշիացրել են պահուստային ֆոնդը. ո՞ւր են հոսել միլիարդները

Այսօր կառավարության հերթական նիստին, չզեկուցվող հարցրերին անդրադառնալով, ՀՀ ֆինանսների նախարար Ատոմ Ջանջուղազյանը հայտնեց, որ ՀՀ պահուստային ֆոնդի վրա նախարարությունները կարող են այլևս հույս չդնել՝ այն գտնվում է գերծանրաբեռնված վիճակում, փաստացի ռեալ և օպերատիվ լուծում պահանջող ծրագրերի համար պահուստային ֆոնդում այլևս գումար չկա: 

Բոլորի հիշողության մեջ թարմ է, թե ինչպես այս իշխանությունները ՍԴ հարցով հանրաքվե անցկացնելու նպատակով պահուստային ֆոնդից հանեցին 3.5 միլիարդ դրամ: Հանրաքվեն համավարակի և միջազգային կառույցների ճնշման արդյունքում չեղարկվեց , սակայն հետագայում պարզ դարձավ, որ գումարները ծախսվել են անհայտ ուղղությամբ , և ոչ մի լումա պահուստային ֆոնդ չի վերադարձվելու: 

Գործադիրը նար որոշում էր կայացրել կառավարության պահուստային ֆոնդի հաշվին Հայաստանի Հանրապետության առողջապահական և աշխատանքի տեսչական մարմնի կարողությունների զարգացման և տեխնիկական հագեցվածության ապահովման (մեքենաներ և սարքավորումներ, արտադրական ու տնտեսական գույք, գործիքներ և այլ հիմնական միջոցներ) նպատակով Հայաստանի Հանրապետության վարչապետի աշխատակազմին հատկացնել 37 միլիոն 964 հազար դրամ: Բացի այդ, 49 միլիոն դրամ էլ վարչապետի աշխատակազմին հատկացվել էր այլ ծախսերը հոգալու համար: 

Պետական պաշտոնյաների պարգևատրման առյուծի բաժինը նույնպես կատարվել է պահուստային ֆոնդում իբրև թե ավելացած գումարների հաշվին: Հիշեցնենք, որ միայն 2019 թվականին Հայաստանում 100 միլիոն դոլարի պարգևատրում է բաժանվել: 

«Իրազեկ քաղաքացիների միավորում» ՀԿ Ստեփանակերտի գրասենյակին ու «Թրանսփարենսի ինթերնեշնլ» հակակոռուպցիոն կենտրոնին կառավարությունը 33 միլիոն 680 հազար դրամ էր հատկացրել՝ Արցախի ընտրություններում դիտորդական առաքելություն իրականացնելու համար, մի պարագայում, երբ պետությունը չուներ նման որևէ պարտավորվածություն, այն էլ ՝ պետական բյուջեի հաշվին: 

ՀՀ քննչական կոմիտեին հատկացված 396 հազար 900 ԱՄՆ դոլար գումարը փոխանցվել է «Earth link & Advanced Resources Development» (ELARD) ընկերությանը՝ ՀՀ քննչական կոմիտեի հատկապես կարևոր գործերի քննության գլխավոր վարչությունում քննվող քրեական գործով Ամուլսարի ոսկեբեր քվարցիտային հանքի շահագործման նպատակով նշանակված համալիր փորձաքննությունները կատարելու, ինչպես նաև հանքի շահագործման նպատակով կազմված շրջակա միջավայրի վրա ազդեցության գնահատման և բնապահպանական և սոցիալական ազդեցության գնահատման հաշվետվությունների փորձաքննության համար, որը ոչ մի արդյունք չտվեց:

Կառավարության անդամների գործուղումների համար պահուստային ֆոնդից հատկացվել է լրացուցիչ 250 մլն դրամ: Հիմնավորման մեջ ասված էր, որ 2019 թվականի պետական բյուջեով 1185 ծրագրի միջոցառումների գծով նախատեսված գումարները բավարար չեն՝ ներառած ՀՀ վարչապետի որոշումների և նախագծերի պարտավորությունները: 

2019-ին Բաղրամյան պողոտայում Վարդավառի կապակցությամբ կազմակերպված գորգեր լվանալու արարողությանը հատկացվել է 5 միլիոն դրամ: 

2019 թվականի պետական բյուջեի պահուստային ֆոնդից քննչական կոմիտեին հատկացվել է 25 մլն 200 հազար դրամ գումար՝ Կոմիտեի Երևան քաղաքի Մալաթիա-Սեբաստիա վարչական շրջանի քննչական բաժնի, Կոմիտեի Լոռու մարզային քննչական վարչության և Կոմիտեի Արարատի մարզային քննչական վարչության Վեդիի քննչական բաժնի վարչական շենքերի կապիտալ հիմնանորոգման և ընթացիկ նորոգման աշխատանքներ իրականացնելու համար: 

2019-ին շուրջ 1 միլիարդ դրամ լրացուցիչ հատկացվել է ԱԺ-ին գործուղումների, ռենտգեն սարքերի ձեռք բերման համար: 

2018 թվականի դեկտեմբերին արտահերթ խորհրդարանական ընտրությունների կազմակերպման նպատակով Կառավարության պահուստային ֆոնդից ՀՀ Կենտրոնական ընտրական հանձնաժողովին հատկացվել է 2,707,144,200 հազար դրամ: 

Ուսումնասիրելով այս ծախսերը` պարզ է դառնում, թե ուր են փոշիացել պահուստային ֆոնդի գումարները և ինչու է այն այսօր գերծանրաբեռնված: Ընդամենը մեկ տարի առաջ ԱԺ նիստում վարչապետը հայտարարում էր, որ Հայաստանը չունի փողի խնդիր, կա միայն որակյալ ծրագրերի խնդիր, որոնք կարող են ֆինանսավորվել: Այսօր, սակայն, պարզվում է, որ ծրագրերը , ինչպես նաև իրավիճակով պայմանավորված` այդ գումարի խիստ անհրաժեշտությունը առկա է, մինչդեռ գոմարները՝ ոչ…