Պակիստանի Փեշավար շուկայում պայթյունի հետևանքով զոհվել է 11 մարդ

Առնվազն 11 մարդ է զոհվել և 16-ը՝ վիրավորվել Պակիստանի Փեշավար քաղաքի շուկաներից մեկում տեղի ունեցած պայթյունի հետևանքով։ Միջադեպը տեղի է ունեցել ուրբաթ օրը երեկոյան Փեշավար քաղաքի հարավային արվարձանում՝ Մաթանի թաղամասում։ Բոլոր տուժածները շտապ տեղափոխվել են հիվանդանոց։ Հաղորդվում է, որ տուժածներից հինգը գտնվում են ծանր վիճակում: Ըստ ականատեսների՝ պայթյունը տեղի է ունեցել երեկոյան, երբ շուկայում համեմատաբար մարդաշատ է։

Ըստ որոշ տեղեկությունների՝ պայթեցված մեքենան գտնվում էր մեքենաների վերանորոգման արհեստանոցում։ Խայբեր-Պախտունխվա գավառի իշխանությունները, որի մեջ է մտնում նաև Փեշավար քաղաքը, հաստատում են այս տեղեկությունը: Ահաբեկչության համար պատասխանատվությունը դեռ ոչ ոք իր վրա չի վերցրել: Ոստիկանությունը կարծում է, որ պայթյունը կարող էին իրականացնել թալիբները, որոնք ակտիվ են հատկապես Պակիստանի հյուսիս-արևմուտքում՝ այն թաղամասերում, որոնք ընդհանուր սահման ունեն Աֆղանստանի հետ։

Հիշեցնենք, որ այս ամառ տարածաշրջանում տեղի են ունեցել մի շարք նման հարձակումներ, որոնց հետևանքով մահացել է մի քանի տասնյակ մարդ: