Հայոց եկեղեցու պատմությունը պիտի դասավանդվի որպես առանձին առարկա. Գարեգին Բ

Կաթողիկոսը դասախոսների և ուսուցիչների օրհնության կարգի ժամանակ անդրադարձել է «Հայոց եկեղեցու պատմություն» առարկային։ Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսն իր մտահոգությունն է հայտնել «Հայոց եկեղեցու պատմություն» առարկայի` դպրոցական ծրագրից հանելու և առարկաների մեջ տարրալուծելու համար։ Գարեգին Բ-ն նման կարծիք է հայտնել այսօր` Մայր Աթոռ Սուրբ Էջմիածնում կրթության մշակների օրհնության կարգ անցկացնելու ժամանակ։

2020-2021 թթ. ուսումնական նոր տարեշրջանի մեկնարկի առթիվ կայացած արարողությանը մասնակցում էին կրթական պետական կառույցների ներկայացուցիչներ, ԲՈւՀ-երի ռեկտորներ և ՀՀ մի շարք դպրոցների մանկավարժներ: «Գիտակրթական հաստատությունների, ինչպես և մասնագիտական շրջանակների հնչեցրած տեսակետներն ու առաջարկներն ամենայն լրջությամբ նկատի առնելը, բարձրաձայնված խնդիրները համակողմանի քննարկելը պիտի նպաստեն կրթական բարեփոխումների ընթացքին։ Ցավում ենք նաև, որ նախարարության կողմից տակավին չեն իրականացվել քայլեր՝ խորհրդակցելու և համագործակցելու Մայր Աթոռի կրթական հարցերով ենթախմբի հետ»,–ասել է Գարեգին Բ-ն։

Հիշեցնենք` կրթական չափորոշիչների փոփոխության նախագիծ է մշակվել, ըստ որի` «Հայոց եկեղեցու պատմություն» առարկան միավորվելու է այլ առարկաների հետ և որպես առանձին առարկա չի դասավանդվելու։