Հունգարացի հայագետը ներողություն է խնդրում հայ ժողովրդից

Այսօր ՀՀ Արտաքին գործերի նախարարության դիմաց տեղի ունեցավ բողոքի ակցիա, որին մասնակցում էր նաև հունգարացի հայագետ Բենեդեկ Զիգմոնդը։ 

Հայագետը ամոթով էր խոսում իր երկրի վարած քաղաքականության վերաբերյալ և իր խոսքով այսուհետ ամոթով է նշում, որ ինքը Հունգարացի է։

«Ես ներողություն եմ խնդրում ամբողջ հայ ժողովրդից և Գուրգեն Մարգարյանի հարազատներից ինձ համար անընդունելի և անբարոյական արարքի համար։ Այն, ինչ երեկ Հունգարիայի կառավարությունը արեց՝ խախտում է բոլոր բարոյական և համամարդկային արժեքները։ Ես չեմ կարող համաձայն լինել Հունգարիայի կառավարության այդ քայլի հետ»,- ասաց հայագետը։ 

Իր երկրի արած քայլը հայագետը որակեց` որպես անբարոյականություն, քանի որ այս սպանությունը համայն մարդկության դեմ արված հանցագործություն է։ Եվ այդպիսի մարդուն արտահանձնել Ադրբեջանին Հունգարարիայի դիվանագիտության պատմության մեջ վերջին քսան տարվա ամենամեծ սխալն է համարում։

Պաշտոնական Երեւանի տեսակետի վերաբերյալ, որ Հունգարիան մարդասպանին հանձնել է՝  գործարքի գնալով Ադրբեջանի հետ, Բենեդեկ Զիգմոնդը  պատասխանեց. «Կարծում եմ՝ այո, այդպես է եղել: Եթե եղել է հավանական գործարքի վարկածը, դա համարում եմ շատ անբարոյական, որովհետեւ ինչպես հայտնի է՝ Ադրբեջանը Հունգարիայի համար կարեւոր առեւտրային գործընկեր է, բայց առեւտրային գործընկերությունը չպետք է գերազանցի համամարդկային արժեքները»:

Մանրամասները՝ տեսանյութում: