Խնդրում ենք՝ հումանիտար միջանցք տրամադրեք երեք հազար հայ քաղաքացիներին. Գագիկ Մանասյանի նամակը՝ Միխեիլ Ջանելիձեին
Արտաքին Քաղաքական
Հայաստանի մտավոր սեփականության պաշտպանության խորհրդի նախագահ Գագիկ Մանասյանը նամակ է հղել Վրաստանի Հանրապետության փոխվարչապետ, Արտաքին գործերի նախարար պրն. Միխեիլ Ջանելիձեին, որը ներկայացնում ենք ստորև.
«Ծանուցման կարգով ուզում ենք Ձեզ տեղեկացնել, որ Հայաստանի Հանրապետության մտավորականության շրջանում անհանգստություն է առաջացրել այն հանգամանքը, որ Վրաստանի տարածքով արգելվում է Ռուսաստանի Դաշնության քաղաքացի հանդիսացող մոտ երեք հազար հայ ընտանիքների վերադարձը Ռուսաստան։
Հավելենք նաև, որ նշված քաղաքացիները նախքան աշխարհում մոլեգնող համավարակի սաստկացումն են այցելել Հայաստան: Շուրջ վեց ամիս է, ինչ նրանք չեն կարողանում վերադառնալ ու վերամիավորվել իրենց ընտանիքներին: Նրանցից շատերը թողել են իրենց երեխաներին, ծնողներին և այլ հարազատների, իսկ շատերն էլ, ամենայն հավանականությամբ, արդեն իսկ կորցրել են իրենց աշխատանքը: Հանգամանք, ինչն ուղեկցվում է կենցաղային և հոգեբանական բազում նեգատիվ ազդեցություններով:
Հայերը և վրացիները լինելով եղբայրական ժողովուրդներ, բախտորոշ պահերին մշտապես եղել են կողք-կողքի, միմյանց օժանդակել դժվարագույն պահերին, ինչպես պատշաճում է իրապես հարազատ եղբայրներին։ Սպիտակյան երկրաշարժի ժամանակ հենց մեր վրացի եղբայրները առաջինը օգնության հասան, ինչի համար մշտապես երախտապարտ ենք: Վրաստանի համար ծանր՝ 2008թ. ռուս-վրացական օգոստոսյան պատերազմի ժամանակ էլ, Ռուսաստանի ռազմական դաշնակիցը լինելով հանդերձ՝ Հայաստանը բացեց իր օդային և ցամաքային ճանապարհները վրաց եղբայրների առջև ու ապաստանեց մեծաթիվ կանանց ու երեխաների:
Մեծարգո պրն. նախարար, Հայաստանի Հանրապետության մտավորականության անունից դիմելով Ձեզ, խնդրում ենք՝ իբրև բարի կամքի և մարդասիրության դրսևորում, Դուք նույնպես եղբայրական վարք դրսևորեք և հումանիտար միջանցք տրամադրեք նշված երեք հազար քաղաքացիներին՝ Ռուսաստանում գտնվող իրենց ընտանիքներին վերամիավորվելու նպատակով։
Հումանիտար միջանցքից օգտվելու դեպքում՝ հիշյալ քաղաքացիները պատրաստ են կատարելու Վրաստանի կառավարության կողմից իրենց ներկայացվելիք բոլոր այն պահանջները, որոնք բխում են «Covid-19 »-ի տարածումը կանխարգելու նախապայմաններից»։
ՈՒՂԻՂ ԵԹԵՐ
Ամենադիտված 
«Անցած գիշեր Գյումրիի երկնքում բնակիչները ֆիքսել են այսպիսի լուսին». Գագիկ Սուրենյան (տեսանյութ)
