Ժողովուրդը ո՞նց է ապրելու, իրենց ընտանիքը ո՞նց են պահելու. խաղողագործները բողոքում են

Տնտեսություն 16 Սեպտեմբեր, 2020 12:23

Գյուղացիները կրկին բողոքի ակցիա են իրականացնում` պահանջելով խաղողի մթերման գինը 135 դրամից դարձնել 150 դրամ: Այս անգամ նրանց բողոքի ակցիան դրսևորվել է Երևան- Արտաշատ ճանապարհը փակելով: «Առավոտվանից Արտաշատ-Երևան ճանապարհը փակել ենք: Բողոքողները Արտաշատի տարբեր գյուղերից են, օրինակ Վերին Արտաշատից, Ոստանից: Բողոքի ակցիա իրականացնողները այնքան շատ են, որ հաշվել չի լինի, բոլոր այգետերերը եկել են»,- այս մասին ԼՈՒՐԵՐ.com-ի հետ զրույցում ասաց «Ժողովրդավարական Արարատ » հասարակական կազմակերպության նախագահ Հենրիկ Ավագյանը:

Նա նշեց, որ ճանապարհը այնքան ժամանակ են փակ պահելու, մինչև մարզպետը որոշում կայացնի ու ներկայացուցիչների բերի, որոնք խաղողի մթերմանը կտան նորմալ գին:

«Մարդկանց խաբում են, հիմա էլ ասում են գրադուս պիտի տաք: Բերում, ասում են՝ այսքան է քո խաղողի գրադուսը, բա մենք ինչ իմանանք` ինչքա՞ն է, մենք գրադուս ունե՞նք, որ իմանանք խաբում են մեզ, թե չէ: Ժողովուրդը ասում ա` խաղողի մթերման գինը գոնե 150 դրամ լինի: Մարդիկ ամբողջ տարի իրանց երեխեքի հետ տանջվել, քրքրվել են, որ այդ գումարով ձմեռը կարողանան ապրեն: Իսկ, եթե խաբեն ու դա էլ ժողովրդի ձեռքից առնեն, ժողովուրդը ո՞նց ա ապրելու, իրենց ընտանիքը ո՞նց են պահելու, իրենց հույսն ու հավատը այդ այգին է»,- ասաց Հենրիկ Ավագյանը:

Վերջինս նշեց, որ եթե մարզպետը իրենց խնդրին լուծում չտա, իրենք ճանապարհը օրեր շարունակ փակ են պահելու. «Ժողովուրդը շատ բարկացած է և գազազած: Մարզի տերն ու տիրակալը մարզպետն է և պետք է մեր խնդրին լուծում տա: Մարզպետը ինչի համար է, թող կառավարությունից մարդ գա, ով պատասխան կտա ժողովրդին: Բա այս երկրի տերն ու տիրակալը ո՞վ է, այդ մի քանի թափթփուկ գործարանի տերերն են այս երկրի տերը, իրե՞նք են ժողովրդի բախտը որոշողները: Իրենք միլիոններ ու միլիարդներ են առնում ու ժողովրդից ուզում են խաղողը ձրի վերցնեն ու ծախեն Ռուսաստանին կամ ուրիշ երկրին»,- նշեց բողոքի ակցիա իրականացնողներից մեկը: