Լավրով. «Էկվադորի դեսպանատունը արշավելու սպառնալիքները դուրս են իրավական շրջանակներից»

Էկվադորի դեսպանատունը, որտեղ թաքնվում է Վիքիլիքս կայքի հիմնադիր Ջուլիան Ասանժը, բռնի ուժով զավթելու սպառնալիքները դուրս են իրավական շրջանակներից,- ասել է ՌԴ արտաքին գործերի նախարար Լավրովը,- գրում է РИА-Новости-ն:

Վիքիլիքսի հիմնադիրը Շվեդիայում մեղադրվում է մի շարք հանցագործությունների մեջ, որոնք տեղի են ունեցել 2010 օգոստոսին: Շվեդիայի իշխանությունները Մեծ Բրիտանիայից պահանջում են հանձնել հանցագործին: Իսկ ինքը՝ 41-ամյա Ասանժը, որը Ավստրալիայի քաղաքացի է, հունիսի կեսերից գտնվում է Մեծ Բրիտանիայում Էկվադորի դեսպանատանը: Օգոստոսին Էկվադորը որոշում կայացրեց ապաստան տրամադրել Ասանժին, մինչդեռ բրիտանական իշխանությունները լի են Շվեդիայի առաջ «իրենց պարտականությունները կատարելու» վճռականությամբ:

«Քանի դեռ Ասանժը գտնվում է Էկվադորի տարածքում, կարծում եմ, ոչ ոք չի փորձի դիմել չմտածված քայլերի, և ապաստանի իրավունքը պետք է հարգվի: Ոչ ոք չի կարող վիճարկել իրավաբանական գործընթացները, սակայն երբ սպառնում են զավթել Էկվադորի դեսպանատունը, ինչպես զավթել էին Ձմեռային պալատը, կարծում եմ, դա որոշակի շեղում է իրավական դաշտից»,- նշել է Լավրովը՝ ելույթ ունենալով Մոսկվայի միջազգային հարաբերությունների պետական ինստիտուտի ուսանողների առջև:

Ինքը՝ Ասանժը, բացարձակապես մերժում է իր հասցեին բոլոր մեղադրանքները՝ անվանելով դրանք Աֆղանստանում և Իրաքում ռազմական գործողությունների վերաբերյալ գաղտնի նյութերի հրապարակումից հետո Վիքիլիքսի դեմ տարվոող «կեղտոտ արշավի» մի մաս: Սկանդալային կայքի հիմնադիրը բազմիցս մտավախություն է հայտնել, որ հենց ինքը հայտնվի Շվեդիայում, ԱՄՆ-ն կպահանջի իր՝ Ասանժի հանձնումը իրենց: