Ազգային պատկերասրահի կայքում հաշվառված են 14 հազար թանգարանային նմուշի տվյալներ

Գիտություն և Մշակույթ 6 Դեկտեմբեր, 2011 21:38

2010 թ.-ին, ՀՀ կառավարության նախաձեռնությամբ և ֆինանսավորմամբ, Հայաստանի ազգային պատկերասրահի համար «Հելիքս» կազմակերպության կողմից ստեղծվել է նոր` ժամանակակից դիզայնով և տեխնիկական հնարավորություններով, եռալեզու (հայերեն, անգլերեն, ռուսերեն) վեբ-կայք։ Ստեղծվել է նաև ՀԱՊ-ի հավաքածուի առանձնահատկություններին համապատասխան հատուկ շտեմարան, որի միջոցով շարունակաբար արդեն իսկ թվայնացվում է Ազգային պատկերասրահի ողջ հավաքածուն։

ՀԱՊ-ի անձնակազմի ավելի քան մեկ ու կես տարվա աշխատանքի արդյունքում` ստեղծվել և մուտքագրվել է կայքի բովանդակությունը` պատմության, հավաքածուի, գործունեության, աշխատակազմի, միջոցառումների, կրթական ծրագրերի, հրատարակումների, մասնաճյուղերի և այլ բաժիններում։

ՀԱՊ-ի կայքի շտեմարան բաժնում Հայաստանի թանգարանային ոլորտում առաջին անգամ թվայնացված ներկայացվելու է ողջ հավաքածուն: Ներկայումս շտեմարանի բազայում հաշվառված են ՀԱՊ-ի շուրջ 26.000 թանգարանային նմուշից մոտ 14.000-ի տվյալները, որոնցից ավելի քան 11.000-ը հասանելի են շտեմարանի այցելուներին: Բաժինը մշտապես համալրվելու է։ Հետագայում հասարակությանն առաջարկվելու են նաև ուսուցողական, ժամանցային և հետաքրքրական այլ էջեր ևս։

Հայաստանի ազգային պատկերասրահի՝ www.nga.am, www.gallery.am կայքի շնորհանդեսով կսկսվի նոր փուլ` այն կդառնա հանրությանն արվեստին մոտեցնող, հայ ազգային արվեստի միջազգային հանրահռչակմանը նպաստող դինամիկ վիրտուալ աշխարհ: