Ի՞նչ է մեզ սպասվում, եթե Սաֆարովների վաշտ մտնի Երևան

«Ռամիլ Սաֆարովը կդառնա հակահայկական հիստերիայի կարևոր մասնիկներից մեկը՝ կշրջի դպրոցներով, կհանդիպի երեխաների հետ, կսկսի պատմել, թե այդ սրիկա, ստոր օկուպանտ հայերի հետ հենց այդպես պետք վարվել և այդ կերպ պետք է հարցերը լուծել»։ Lurer.com-ի հետ զրույցում այսպես արտահայտվեց լրագրող, քաղաքացիական ակտիվիստ Արմեն Հովհաննիսյանը՝ անդրադառնալով Ադրբեջանի նախագահի ստորագրած հրամանագրին, որով արդարացրել է 2004թ. Բուդապեշտում հայ սպա Գուրգեն Մարգարյանին կացնահարելով սպանած ադրբեջանցի սպա Ռամիլ Սաֆարովին։

«Ինձ համար որևէ անակնկալ այդտեղ չկա։ Թերևս անհասկանալի է Հայաստանի ԱԳՆ-ի դիրքորոշումը, քանի որ սպանվել էր մեր սպան, մեր քաղաքացին, հայ մարդը։ Ինչու՞ հանդիպակած գործընթաց չկար. պահանջ, որ այդ մարդը մնար Հունգարիայում, քանի որ ակնհայտ էր, որ Ադրբեջանում նա չէր կրելու իր պատիժը։ Ի՞նչ էր անում ԱԳՆ-ն, երբ ոչինչ չնախաձեռնեց, որպեսզի այդ փոխանցումը չիրականանար։ Խայտառակությունը մեր պահվածքն է։

Ադրբեջանի քաղաքականությունն արդեն բացարձակապես պարզ պատմություն է. մենք գիտենք ում հետ գործ ունենք։ Այս քայլով գերխաղաղասերները թող իմանան, թե ով է մեր հարևան ժողովրդի հերոսը, ինչ իդեալներով են դաստիարակում իրենց երեխաներին և ինչ է մեզ սպասվում, եթե Սաֆարովների մեկ վաշտ մտնի Երևան»-նշեց Արմեն Հովհաննիսյանը։

Իսկ այն հարցին, թե այսօր ինչպիսին պետք է լինի Հայաստանի դիրքորոշումը Արմեն Հովհաննիսյանը պատասխանեց. «քանի որ ինչպես միշտ հետևից հասնողի դերում ենք, ամբողջ աշխարհին պետք է ցույց տանք, թե ով է այս մարդկանց հերոսը և ինչ փաստի համար են հերոսացնում։ Համատեղ ուսման ժամանակ գիշերը մարդուն կացնահարելու համար մարդասպանին հերոս են հայտարարում։ Մենք, իհարկե, կարող ենք համաշխարհային հանրությանը հասցնել այս տեղեկությունը, բայց նախօրոք մտածել էր պետք։ Երբ մենք գիտեինք, որ Ադրբեջանը համապաատասխան գործընթաց է սկսել, պետք է սկսեինք հակադարձը»։

Նելլի Ավետիսյան