Հոկտեմբերին աննախադեպ պահեստազորի կանչ. ՊՆ խոսնակ

Օրեր առաջ, մամուլում լուրեր տարածվեցին, որ երկրի ղեկավարությունը որոշել է հոկտեմբերին իր մասշտաբներով նմանը չունեցող համապետական զորահավաք անցկացնել: Նախատեսված է հավաքել մինչև 58 տարեկան մի քանի տասնյակ հազար պահեստային շարքայինների ու սպաների:

Լուրը ճշտելու համար Լուրեր.com–ը զրուցեց ՊՆ մամլո խոսնակ Արծրուն Հովհաննիսյանի հետ, ով նշեց, որ դա զորահավաք չէ, այլ՝ պահեստազորի կանչ. «Դա պահեստազորի կանչ է, դա չի կոչվում զորահավաք։ Հոկտեմբերին կայանալիք մեծամասշտաբ զորավարժություններին մասնակցելու են մեծ քանակով պահեստազորայիններ։ Բայց դա չի նշանակում, որ զորահավաք է»։

Հարցին, թե ճի՞շտ են լուրերը, որ զորավարժությունները մասշտաբներով մեծ են լինելու, ՊՆ խոսնակն ասաց. «Այո, մասշտաբները մեծ են, մինչ այս, այսպիսի նախադեպ չենք ունեցել, մեծ մասշտաբներով զորավարժություն չենք արել։ Մենք մեր մարտունակության բարձրացման ուղությամբ կատարում ենք պլանային զորավարժություններ, որոնք տարեց–տարի ենթադրում են ավելի մեծ ներգրավվածություն, այսինքն  կայացում, մարտունակության բարձրացում, որը ենթադրում է նաև պահեստազորայինների կանչ։ Դա ամբողջ աշխարհում նորմալ պրակտիկա է»։

Հիշեցնենք, որ ըստ մամուլի հրապարակման, հոկտեմբերի 1-10-ը կազմակերպվող զինավարժությունը պատշաճ կազմակերպելու համար պաշտպանության նախարարությունը դիմել է կառավարությանը՝ տեղեկացնելով, որ իր ուժերից վեր է այդքան մարդկանց հավաքելը, և խնդրել է տեղական ինքնակառավարման մարմինների աջակցությունն այդ հարցում:

Տեղական զինկոմիսարիատների հետ քաղաքապետարաններն ու թաղապետարաններն արդեն լծվել են զորահավաքի աշխատանքներին:

Նշենք նաև, որ ըստ մամուլի, զորավարժությունը զուտ խաղաղ նպատակներով է անցկացվելու: 

Գայանե Համբարձումյան