Համերգ` նվիրված Սպիտակի երկրաշարժի զոհերի հիշատակին

Դեկտեմբերի 4-ին, Ալ. Սպենդիարյանի անվան ազգային ակադեմիական թատրոնի հրավերով, միայն մեկ համերգով հանդես է եկել ռոմանտիզմի դարաշրջանի կոմպոզիտորների գործերի մեկնաբանմամբ համաշխարհային ճանաչման արժանացած, վիրտուոզ դաշնակահար Ալեքսանդր Թորաձեն, ով կատարողական արվեստում իր առաջին հաջողությունն արձանագրել է Հայաստանում: 1969 թ.-ին 16 տարեկան պատանի դաշնակահարը մասնակցել է Երևանում կայացած դաշնակահարների անդրկովկասյան մրցույթին` արժանանալով 1-ին մրցանակի:

Ալ. Սպենդիարյանի անվան ազգային ակադեմիական թատրոնի նվագախմբի հետ (դիրիժոր` Կարեն Դուրգարյան) Ալեքսանդր Թորաձեն հանդես է եկել Ս. Պրոկոֆևի N3 և Դ. Շոստակովիչի N2՝ դաշնամուրի և նվագախմբի համար կոնցերտներով:

Ալեքսանդր Թորաձեն ծնվել է Թբիլիսիում: Ավարտել է Մոսկվայի Պ. Չայկովսկու անվան կոնսերվատորիան, որտեղ և հետագայում ստացել է պրոֆեսորի կոչում: Նա նաև Ինդիանայի համալսարանի պրոֆեսոր է, Տոկիոյի և Սեուլի ֆիլհարմոնիկ նվագախմբերի հրավիրյալ դաշնակահար: 1983 թ.-ից Թորաձեն բնակություն է հաստատել ԱՄՆ-ում: 

Ալեքսանդր Թորաձեն հաճախակի համերգներով հանդես է գալիս Հյուսիսային Ամերիկայի այնպիսի առաջատար նվագախմբերի հետ, ինչպիսիք են` Նյու Յորքի, Քլիվլենդի, Ֆիլադելֆիայի, Լոս Անջելեսի, Սան Ֆրանցիսկոյի, Միննեսոտայի, Հյուստոնի, Մոնրեալի, Տորոնտոյի, Դետրոյթի, Փիթսբուրգի, Բալթիմորի, Ցինցինատիի, Սիեթլի, Վաշինգտոնի ազգային սիմֆոնիկ նվագախմբերը: Ինչպես նաև մշտապես հանդես է գալիս Սանկտ Պետերբուրգի, Բիրմինգհեմի, Լոնդոնի, Իսրայելի, Ֆրանսիայի, Գերմանիայի, Լեհաստանի, Չեխիայի, Նիդեռլանդների, Ֆինլանդիայի, Նորվեգիայի, Շվեդիայի և Իտալիայի ֆիլհարմոնիկ նվագախմբերի, Բավարիայի ռադիոյի սիմֆոնիկ նվագախմբի և Մետրոպոլիտան թատրոնի նվագախմբի հետ:

"Philips"-ի կողմից թողարկված Սերգեյ Պրոկոֆևի 5 կոնցերտների ձայնագրությունները՝ Ալեքսանդր Թորաձեի մեկնաբանմամբ և Վալերի Գերգիևի ղեկավարությամբ, վճռորոշ դերակատարում են ունեցել, քանզի Ս. Պրոկոֆևի թիվ 3 կոնցերտի ձայնագրությունը «Միջազգային դաշնամուր» ամսագրի կողմից ճանաչվել է «Բոլոր ժամանակների լավագույն կատարում» (երբևէ կատարված 70 ձայնագրությունների շարքում): Մնայուն կատարումներ են նաև Ռավելի, Պրոկոֆևի, Մուսորգսկու և Ստրավինսկու գործերի ձայնագրությունները՝ կատարված "Angel/EMI" ստուդիայի կողմից, ինչպես նաև Սկրյաբինի «Պրոմեթևս»-ը («Կրակի պոեմ»), Մարիինյան թատրոնի սիմֆոնիկ նվագախմբի հետ՝ Վալերի Գերգիևեի ղեկավարությամբ:

Ներկայումս Ա. Թորաձեն ձայնագրում է Դ. Շոստակովիչի դաշնամուրի համար կոնցերտը Ֆրանկֆուրտի ռադիոյի նվագախմբի հետ՝ Փաարվո Ջարվիի ղեկավարությամբ: