Պատվոգիր օզոնային շերտի պահպանմանն աջակցելու համար

Հայաստանի Հանրապետությունը` ի դեմս ՀՀ բնապահպանության նախարարության, ՄԱԿ-ի Շրջակա միջավայրի ծրագրի (UNEP) և Օզոնի քարտուղարության` Մոնրեալի արձանագրության 25-ամյակի կապակցությամբ շնորհել է պատվոգիր` «Օզոնային շերտը քայքայող նյութերի մասին» անվամբ: Այս մասին տեղեկացնում են ՀՀ բնապահպանության նախարարության մամուլի ծառայությունից:

ՀՀ բնապահպանության նախարարությունն այս պատվին է արժանացել գալիք սերունդների համար օզոնային շերտը պահպանելու գործում էական ներդրման, օզոնային շերտը քայքայող նյութերի փոխարինմանն ուղղված շարունակական և հետևողական աշխատանքի շնորհիվ:

Հիշեցնենք հիմնական ձեռք բերումներն այս ոլորտում. 1999թ. Հայաստանի Հանրապետությունը վավերացրեց  «Օզոնային շերտի պահպանության նասին» Վիեննայի կոնվենցիան, «Օզոնային շերտը քայքայող նյութերի մասին» Մոնրեալի արձանագրությունը և պարտավորվեց մինչև 2010թ. 100%-ով դուրս բերել գործածումից օզոնաքայքայիչ առավել վտանգավոր նյութերը: 2003թ. վավերացվեցին Արձանագրության լոնդոնյան և կոպենհագենյան, իսկ 2008թ.` մոնրեալյան և պեկինյան ձևաչափերը: 2006թ. ընդունվեց «Օզոնային շերտը քայքայող նյութերի մասին» ՀՀ օրենքը, իսկ 2007թ.` այդ օրենքի կիրարկումն ապահովող ենթաօրենսդրական ակտերը: 2005-2007թթ. առևտրային սառնարաններ արտադրող «ՍԱԳԱ» և աերոզոլներ արտադրող «Հայկենցաղքիմ» գործարաններում փոխարինվում են օզոնաքայքայիչ նյութերով աշխատող հոսքագծերը, ուսուցանվում և համապատասխան սպասարկման սարքավորումներով են ապահովվում սառնարանային և օդի օդակարգավորման սարքավորումների 712 վարպետներ, ուսուցանվում են 112 մաքսային ծառայողներ օզոնաքայքայիչ նյութերի ապօրինի առևտուրը կանխարգելելու նպատակով: Հանրապետության ամբողջ տարածքում իրազեկման բազմաթիվ և բազմաբնույթ սեմինարներ են անցկացվում օզոնային շերտի պահպանության մասին: Սեմինարներն ուղեկցվում են միջոցառումների մասնակիցներին համապատասխան գրականության և հուշանվերների բաշխմամբ: 2010թ.-ի հունվարի 1-ից դադարում է ՀՀ տարածք առավել վտանգավոր օզոնաքայքայիչ նյութերի ներմուծումը: Դեռևս շատ անելիքներ կան և Հայաստանը շարունակում է աշխարհի հանրության հետ պայքարել օզոնային շերտի վերականգնման համար: