Պայթյուն Դամասկոսի կենտրոնում

Սիրիական «Սանա» գործակալությունից տեղեկանում ենք, որ զինված խմբավորումները Աբու Ռումանա թաղամասում պայթյուն են իրականացրել զինվորական գլխավոր շտաբի շենքի մոտակայքում: Պայթյունի հետևանքով չորս մարդ է վիրավորվել, զոհեր չկան:

Արաբական լրատվամիջոցները տեղեկացնում են, որ սիրիական ազատ բանակի ճյուղ կազմող «մարգարեի հետնորդներն» իրենց վրա են վերցրել իրականացված պայթյունի պատասխանատվությունը: Սիրիայի ընդդիմադիրները հայտարարել են, որ սեպտեմբերի 2-ին Բաշար ալ Ասադի ուժերը Համայի շրջանում սուննիներով բնակեցված ալ Ֆան գյուղում ավելի քան 25 մարդ են սպանել: Նրանց խոսքով` նույն օրը Հալեպի թաղամասերը, մասնավորապես` Ալ Իզաա, Սախուր, աշ Շաար, Մասաքին, Հանանու թաղամասերը ևս ռմբակոծության են ենթարկվել կառավարական ուժերի կողմից, որի հետևանքով մարդիկ են զոհվել եւ շինություններ են ավերվել:

Իր հերթին Սիրիական «Սանա» գործակալությունը տեղեկացրել է, որ ալ Ֆան գյուղում Սիրիայի զինված ուժերը բախումներ են ունեցել զինված խմբավորումների հետ, որոնք հարձակվել էին տեղի բնակիչների վրա: Զինյալները ձերբակալվել են և առգրավվել են նրանց զենքերը:

Բացի դրանից՝ զինված ուժերը Ազիր գյուղի մոտ կանխել են Լիբանանի տարածքից տասնյակ զինյալների ներխուժումը Սիրիա: Զինյալներից շատերը փախուստի են դիմել, կան նաև վիրավորներ:

Նշենք, որ գրեթե 18 ամիս շարունակվող բախումների հետևանքով զոհվել են մեկ տասնյակից ավելի սիրիահայեր։