«Տեր-Պետրոսյանի քայլը պատիվ չի բերում նրան». Քաղաքագետ

Լուրեր.com-ի զրուցակիցն է քաղաքագետ  Հրանտ Մելիք-Շահնազարյան։

-Պարոն Մելիք-Շահնազարյան, վերջերս Դուք հայտարարեցիք, որ ՀՀ առաջին նախագահ Լևոն Տեր-Պետրոսյանը դատական հայց է ներկայացրել Հայաստանի դեմ: Որտեղի՞ց այդ տեղեկությունը:

Ճիշտն ասած, տարօրինակ է, որ այդ լուրի սկզբնաղբյուրը համարվեցի ես: Իրականում այդ փաստի մասին տեղեկատվությունը դեռևս մայիսին հրապարակվել էր Մարդու իրավունքների եվրոպական դատարանի պաշտոնական կայքում, որտեղ մանրամասն ներկայացված են գործի բոլոր հանգամանքները: Ինձ համար զարմանալի էր, որ հայկական լրատվամիջոցները ժամանակին ուշադրություն չեն դարձրել այդ նյութերի վրա: Թերևս, պարզապես չեն իմացել, որ Տեր-Պետրոսյանը նման քայլի է դիմել:

-Դատելով ՀԱԿ ակտիվիստների մեկնաբանություններից՝ նրանք նույնպես չեն իմացել այդ մասին: Ինչպես հայտնի է, Լևոն Զուրաբյանը, Հրանտ Բագրատյանն ու Լյուդմիլա Սարգսյանը հերքել են այդ լուրի ճշմարտացիությունը:

Նրանք չէին կարող չիմանալ դրա մասին: Մանավանդ Լևոն Զուրաբյանը, որը ՀԱԿ համակարգողն է: Տեր-Պետրոսյանի այդ քայլը հստակ ընդգծված քաղաքական, ինչ-որ տեղ նաև քարոզչական բնույթ ունի և նա պետք է որ խորհրդակցած լիներ իր թիմակիցների հետ: Հակառակ պարագայում պետք է ենթադրել, որ ՀԱԿ առաջնորդին չի հետաքրքրում դաշինքի այլ անդամների կարծիքը: Այս պարագայում Լևոն Զուրաբյանը պետք է ընդունի կամ իր անպիտանելիությունը Տեր-Պետրոսյանի թիմում, կամ այն, որ, մերժելով դատական հայցի մասին լուրը, նա պարզապես ստում էր: Երկու տարբերակն էլ հավասար չափով հնարավոր են, բայց ես կարծում եմ, որ Զուրաբյանը, ինչպես նաև Բագրատյանն ու Սարգսյանը, պարզապես ստում էին:

-Ինչու՞: Չէ՞ որ բոլոր դեպքերում այդ լուրի իսկությունը պարզվելու էր:

Ավելի ճիշտ կլիներ այդ հարցը նրանց ուղղել: Կարծում եմ՝ մարդիկ պարզապես գիտակցում են, որ Տեր-Պետրոսյանի այդ քայլը պատիվ չի բերում ո՛չ նրան, ո՛չ էլ իրենց քաղաքական թիմին: