ԲՀԿ-ն «կանգնած է մեր երկրի թիկունքում». Տիգրան Ուրիխանյան

Օրեր առաջ Հունգարիայի իշխանությունների կողմից ցմահ դատապարտման ենթարկված մարդասպան Ռամիլ Սաֆարովի արտահանձնելն ու  Ադրբեջանի նախագահի կողմից նրան ներում շնորհելը մեծ աղմուկ բարձրացրեց ինչպես ՀՀ-ում, այնպես էլ աշխարհի մի շարք երկրներում, այդ թվում և` Հունգարիայում:

ՀՀ-ում հարցի վերաբերյալ իրենց պաշտոնական դիրքորոշումն էին հայտնում հասարակական կազմակերպությունները, քաղաքական ուժերը: Սակայն նշվածներից ոչ բոլորն են արտահայտել իրենց պաշտոնական տեսակետը:

Օրինակ՝ «Բարգավաճ Հայաստան» կուսակցությունն իր պաշտոնական տեսակետը չի արտահայտել, թեև հարցի վերաբերյալ քննադատող մեկնաբանություններ հնչել են կուսակցության անդամների կողմից:

Lurer.com-ի հետ զրույցում ԲՀԿ մամլո խոսնակ Տիգրան Ուրիխանյանը, պատասխանելով հարցին, թե ո՞րն է պատճառը, որ կուսակցության անունից պաշտոնական տեսակետ չի հնչել, ասաց. «Ի սեր Աստծո, ամբողջ օրը ԲՀԿ-ն խոսում է այդ հարցի վերաբերյալ: Պետք է պաշտոնապես, հայտարարության պե՞ս ներկայցվի: Մենք բոլորս այդ հարցի վերաբերյալ խոսել ենք այս օրերին, խոսում ենք, խստագույնս դատապարտում ենք: Հստակ խոսել ենք և հիմա բոլորս կանգնած ենք մեր երկրի, մեր ազգի շահի ու պատվի թիկունքում»: 

Նշենք նաև, որ իր պաշտոնական դիրքորոշումը չի հայտնել նաև «Ժառանգություն» կուսակցությունը, սակայն հայտարարությամբ է հանդես եկել կուսակցության երիտասարդական թևը: