Կայացավ առողջապահության նախարարին կից գիտական խորհրդի նիստը

Դերենիկ Դումանյանի հրամանով դեռ մեկ ամիս առաջ ՀՀ առողջապահության նախարարին կից ստեղծվել է գիտական խորհուրդ՝ ՀՀ գիտության վաստակավոր գործիչ, բժշկական գիտությունների դոկտոր, պրոֆեսոր Դրաստամատ Խուդավերդյանի նախագահությամբ։ Խորհրդի կազմում ընդգրկվել են առողջապահության համակարգի տարբեր ոլորտները ներկայացնող ճանաչված գիտնականներ։ Խորհրդատվական այս մարմնի առջև խնդիր է դրվել ուսումնասիրությունների արդյունքում գիտականորեն հիմնավորված առաջարկություններ ներկայացնել ինչպես բժշկագիտության զարգացման ռազմավարության, ժամանակակից չափանիշներին համապատասխան գիտական հետազոտությունների, գերակա ուղղությունների և նորարական ծրագրերի, առողջապահության համակարգում բժշկագիտական ենթակառուցվածքի ձևավորման և գործունեության իրականացման չափորոշիչների, այնպես էլ առողջապահության ոլորտում պետական քաղաքականության մշակման վերաբերյալ։

ՀՀ առողջապահության նախարարին կից գիտական խորհրդի հերթական նիստում քննարկվեց խորհրդի կանոնակարգի նախագիծը։ Դրաստամատ Խուդավերդյանը տեղեկացրեց, որ այն մշակվել է համատեղ ուժերով՝ հաշվի առնելով տարբեր երկրների փորձը, ինչպես նաև մեր երկրում այս ոլորտը կանոնակարգող օրենսդրական դաշտն ու առկա մարտահրավերները։ Չնայած դրան, բավական շահեկան քննարկման արդյունքում առաջարկվեց մինչ նախարարի հաստատմանը ներկայացնելը նախագծում որոշ փոփոխություններ և հստակեցումներ կատարել։

Խորհուրդը քննարկեց նաև 2012թ. սեպտեմբեր-2013թ. դեկտեմբերի աշխատանքային պլանը։ Այս առթիվ տարբեր կարծիքներ հնչեցին ՀՀ առողջապահության համակարգում Բժշկական գիտությունների ակադեմիայի դերի և կարգավիճակի շուրջ։

Նախարար Դումանյանը շեշտեց, որ կարևոր այս հարցում ճիշտ կողմնորոշվելու համար հարկ է ոլորտի գիտնականների հետ քննարկումներ կազմակերպել հստակեցնելու, թե ինչ ներուժ ու խնդիրներ, ինչ մոտեցումներ ու հնարավորություններ են առկա։

Խորհրդի օրակարգում ընդգրկված էին նաև տարբեր հանձնաժողովներ՝ «ՀՀ ԱՆ գիտահետազոտական ինստիտուտների և գիտական կենտրոնների գործունեության համակարգային վերլուծության և հետագա զարգացման ուղիների վերաբերյալ առաջարկությունների մշակման հանձնաժողով», «ՀՀ ԱՆ գիտահետազոտական ինստիտուտների և գիտական կենտրոնների գիտական ուղղությունների վերլուծության և առաջնակարգ գիտական ուղղությունների զարգացման վերաբերյալ առաջարկությունների մշակման հանձնաժողով», ինչպես նաև «ՀՀ առողջապահության նախարարության համակարգի հիմնարկների գիտական նախագծերի, գիտական թեմաների, գիտաժողովների և այլ հետազոտական ծրագրերի հայտերի մասնագիտական կարծիքի ձևավորման և հետագա ֆինանսավորման ներկայացման երաշխավորությունների կազմման գործընթացի կազմակերպման հանձնաժողով» ստեղծելու մասին հարցեր։

«Մենք լուրջ ակնկալիքներ ունենք այս խորհրդի գոծունեությունից։ Գաղտնիք չէ, որ առողջապահական համակարգի գիտահետազոտական ինստիտուտներից շատերն իրենց գործունեությամբ վերածվել են հիվանդանոցների։ Մենք պետք է հստակ պատկերացումներ ունենանք ոլորտի առջև ծառացած բժշկագիտական խնդիրների լուծման ուղղությամբ յուրաքանչյուր գիտահետազոտական ինստիտուտից սպասվող գիտական գործունեության արդյունքների, իրական վիճակի, ինչպես նաև գիտական ու տեխնիկական ներուժի, բացթողումների և առկա խնդիրների մասին։

Այս խորհուրդը կարող է լուրջ դերակատարում ունենալ նաև գիտական աշխատանքների գործնական կիրառության, ասպիրանտական պահանջարկի ուսումնասիրման և կարևոր շատ այլ ոլորտներում»,-ասաց նախարար Դումանյանը։