Կալիֆոռնիայի հայկական օրենսդրական խումբը դատապարտում է Արցախի դեմ ադրբեջանական ագրեսիան

Կալիֆոռնիայի հայկական օրենսդրական խումբը հրապարակավ դատապարտում է Ադրբեջանի ագրեսիվ հարձակումը Արցախի խաղաղ հանրապետության դեմ, գրված է Կալիֆոռնիայի հայկական օրենսդրական խմբի հրապարակած փաստաթղթում: «2020 թ. սեպտեմբերի 27-ին Ադրբեջանը անառարկելի գրոհ ձեռնարկեց Արցախի վրա՝ գնդակոծելով անմեղ քաղաքացիական բնակչությանը Ստեփանակերտում, Արցախի մայրաքաղաքում և հարակից շրջաններում: Ադրբեջանը Արցախի անմեղ հայերին թիրախավորելու երկարամյա պատմություն ունի: Թուրքիան ակտիվ դեր է խաղացել Արցախի նկատմամբ Ադրբեջանի ագրեսիային աջակցելու հարցում՝ զենք տրամադրելով և նույնիսկ վճարովի ջիհադիստ վարձկաններին տեղափոխելով Ադրբեջան: Թուրքիան հայ ժողովրդի նկատմամբ բռնության երկար պատմություն ունի, և այդ բռնությունը շարունակականությունն է ատելության և դաժան հանցագործությունների, որոնք Թուրքիան կատարել է հայ ժողովրդի նկատմամբ ցեղասպանության ընթացքում ավելի քան 100 տարի առաջ: Այս հակամարտությունը տարածվում է նաև Արցախից այն կողմ։ Այս հարձակումները պետք է դադարեցվեն»,֊ ասված է հայտարարության մեջ: