Իրական այլընտրանք՝ Թեղուտի հանքին (Տեսանյութ)

Տեղի ունեցավ «Թեղուտի պաշտպանության» քաղաքացիական նախաձեռնության կողմից կազմակերպված Թեղուտի՝ մեղրի առաջին խմբաքանակի վաճառքը։ Վաճառվեց մոտ 100 կիլոգրամ մեղր։ Գնորդները «Փրկենք Թեղուտը» ֆեյսբուքյան խմբում կիսել են իրենց հիացական կարծիքները Թեղուտի մեղրի վերաբերյալ։

Հիշեցնենք, որ «Թեղուտի պաշտպանության» քաղաքացիական նախաձեռնությունը հանդես է եկել ակցիայով, որով փորձ է արվելու Թեղուտի և շրջակա գյուղերի գյուղատնտեսական մթերքներն իրացնել երևանյան շուկայում: Նախաձեռնության հեղինակների պնդմամբ սա փորձ է ցույց տալու, որ Թեղուտում հանքարդյունաբերությանն էական այլընտրանք է գյուղատնտեսությունը: Այս դեպքում խնդիր է միայն լայն շուկայի և մթերող ընկերությունների բացակայությունը, որի ապահովմամբ պետք է զբաղվեին մեր իշխանությունները՝ ամենուր հանքերի լիցենզիաներ տրամադրելու փոխարեն: Մեկ շաբաթից պատրաստ կլինի մթերքների իրացման համար նախատեսված ինտերնետային կայքը, որտեղ կներկայացվեն նաև Թեղուտի մյուս բարիքները՝ ընկույզ, պնդուկ, մասուր և այլն։ Դրա միջոցով Երևանի բնակիչները կկարողանան առցանց պատվիրել գյուղատնտեսական մթերքներ: Կայքում լուսանկարներով ու գներով կներկայացվեն մթերքները, ինչպես նաև կլինեն տեղեկություններ մթերքն արտադրող գյուղացու ու նրա ընտանիքի մասին, ինչը հնարավորություն կտա ցանկության դեպքում անձամբ կապվել գյուղացու հետ և մեծաքանակ գնման մասին պայմանավորվել: Կանխատեսվում է, որ առցանց մթերքների գնման դեպքում գները կլինեն շուկայականից ցածր, քանի որ վերավաճառողներ չեն լինի:

Մինչ կայքի պատրաստման աշխատանքների ավարտը մթերքներ կարելի է պատվիրել «Փրկենք Թեղուտը» ֆեյսբուքյան խմբում:

Ծրագրի նախաձեռնողները հույս ունեն, որ հաջողության դեպքում սա կարող է գյուղացիներին շուկայի հետ կապելու հրաշալի մոդել դառնալ ոչ միայն Թեղուտի, այլև բոլոր այն գյուղերի բնակիչների համար, ովքեր չեն կարողանում իրենց բերքը հասցնել շուկա։ Իսկ նախաձեռնության սպասվելիք հաջողության մասին է վկայում խոստումնալից սկիզբը՝ 100 կիլոգրամ վաճառված մեղր և գնորդների գոհունակություն։