Ինչպես է սփյուռքը պայքարում հանուն Հայաստանի և Արցախի

Հայկական սփյուռքը շարունակում է հնարավոր բոլոր միջոցներով օժանդակել Հայաստանին և Արցախին: 

Իսրայելահայերն այս օրերին, բացարձակ կարանտինի և տեղաշարժի սահմանափակումների պայմաններում, արդեն 50 հազար դոլարի օգնություն են հատկացրել թե՛ Հայաստանի, թե՛ Արցախի հիվանդանոցներին: «Իսրայելը մոտ 10 հազար հայ հաշվվող համայնք ունի, որոնց անդամները սփռված են ողջ երկրի տարածքով: Շատ ակտիվ հավաքվում է գումար համ Հայֆայում, Երուսաղեմի և կենտրոնի՝ Թել Ավիվի հայությունից, ուղարկում են գումար, բացի դրանից այդ գումարով առնում ենք տեղական արտադրության դեղորայք, որ ուղարկենք Արցախ», - ասաց Պետախ Տիկվայի Նոյան Տապան հայկական կրթական մշակութային կենտրոնի ղեկավար Դավիթ Գալֆայանը: 

Լոս Անջելեսի, Նյու Յորքի հայ համայնքները մարդասիրական օգնություն են ուղարկել Հայաստան և Արցախ, բացի այդ, Լոս Անջելեսի մեր հայրենակիցները արդեն երկու օր է բողոքի ցույց են կազմակերպում` պահանջելով ԱՄՆ իշխանություններից արձագանքել Ադրբեջանի ագրեսիային: Կալիֆորնիայի հայ համայնքը փոխանցել է շուրջ 7 միլիոն դոլար: 

Ֆրանսիայի Մարսել քաղաքում հայ համայնքը մեծ քանակությամբ մարդասիրական օգնություն է հավաքում` այս կերպ իր զորակցությունը հայտնելով Հայաստանին: Աշխատանքները իրականացվում են Սրբոց Թարգմանչաց հայ առաքելական տաճարի, Ալթիչութ 5167 կազմակերպության և Աբովյան Վարժարանի նախաձեռնությամբ:Հայությունը հավաքագրում է անհրաժեշտ նյութական օգնությունը` ամեն օր ստանալով հարյուրավոր արկղեր: Նմանատիպ կետեր են բացվել Ֆրանսիայի այլ բնակավայրերում ևս:Աբովյան վարժարանի սաներն էլ գրել են նամակներ, որոնք արկղերի հետ կհասնեն իրենց հասցեատեր զինվորներին և հայրենակիցներին: Հարյուրավոր հայեր հավաքվել են Փարիզում Ադրբեջանի դեսպանատան դիմաց` իրենց բողոքի ձայնը բարձրացնելու արցախա-ադրբեջանական սահմանին տիրող իրավիճակի վերաբերյալ։ Հանրահավաքի տեսանյութերը սոցցանցերում հրապարակել են Ֆրանսիայի և աշխարհի տարբեր երկրներում բնակվող հայերը։ Ֆրանսիայի հայ համայնքը 700-800 հազար դոլար է ուղարկել հայրենիք: 

Արդեն քանի օր է` Ռուսաստանի հայկական համայնքը վերսկսել է մոբիլիզացման գործընթացները: Շարունակական հանդիպումներ են տեղի ունենում թե՛ Մոսկվայի հայկակայ Առաքելական եկեղեցում , թե՛ Ռուսաստանում Հայաստանի դեսպանատանը, թե՛ համայնքային կազմակերպություններում: Տարբեր հանդիպումներից բացի, նաև Ռուսաստանի հայերը հավաքում են դեղորայք, բժշկական սարքավորումներ, երեխաների համար առաջին անհրաժեշտության իրեր, սանիտարահիգիենիկ պարագաներ, գումար: Հավաքագրվում են նաև կամավորները՝ առաջնագիծ մեկնելու համար: Օգնությունը հատուկ չարտերային թռիչքով առաջիկայում կուղարկվի Հայաստան։ 

Բեռնում՝ Շվեյցարիայի խորհրդարանի շենքի առջև գտնվող հրապարակում, hոկտեմբերի 3-ին տեղի է ունեցել բազմամարդ բողոքի ցույց` ընդդեմ Արցախի և Հայաստանի դեմ Ադրբեջանի ու Թուրքիայի սանձազերծած պատերազմի։ Հայաստանի և Արցախի հետ համերաշխության կարգախոսի ներքո ընթացած ցույցը նախաձեռնել էր Շվեյցարիա-Հայաստան ընկերակցությունը՝ հայկական համայնքային մի շարք կառուցների աջակցությամբ ու գործուն մասնակցությամբ։ 

Կիեւում տեղի է ունեցել Ուկրաինայի հայերի միության արտահերթ նիստ: Հանդիպմանը ներկա էին տարածաշրջանային հայկական համայնքների ղեկավարներ, ՈւՀՄ նախագահ Վիլեն Շատվորյանը, փոխնախագահներ և Ուկրաինայի հայերի միության ներկայացուցիչներ:Հանդիպման ընթացքում ընդունվել են մի շարք կարեւոր որոշումներ, ստեղծվեց շտաբ` գործողությունների արդյունավետ համակարգման համար:Յուրաքանչյուր ոք, ով ցանկանում է օգնել իր պատմական հայրենիքին, կարող է կապվել իր քաղաքի տեղական համայնքի հետ: Հիշեցնենք, որ Ուկրաինայի հայերի միության գործունեության մեջ առանձնահատուկ տեղ են զբաղեցնում մարդասիրական օգնության, բարեգործական և սոցիալական ծրագրերի իրականացման խնդիրները: Ուկրաինայի հայերը նման միջոցառումներ կազմակերպեցին նաև 2016-ի ապրիլյան պատերազմից հետո: 40 ընտանիք Հայաստանում եւ Ղարաբաղում երկարաժամկետ մարդասիրական օգնություն է ստացել Ուկրաինայի հայերի միությունից: Ուկրաինայի հայերի միության նախագահը միության ներկայացուցիչների հետ ժամանելու է Հայաստան, բացի այդ, պատերազմի սկսելու հաջորդ իսկ օրը Ուկրաինայի հայերի միությունը կազմակերպել է դրամահավաք, որի ընթացքում հավաքվել է 2 միլիոն դոլարի չափ օգնություն: 

Ջավախքի օգնությունը նույնպես մեծ է՝ 50 տոննա ալյուր, 30 տոննա կարտոֆիլ, 45 հազար շիշ խմելու ջուր. Եվ սա միայն Ջավախքի առաջին օգնությունն է Արցախին: Բեռնատարների մեջ 35 հազար դոլարի սնունդ է, նախատեսվում է երկու օրը մեկ նման օգնություն ուղարկել Հայաստան և Արցախ: 

Արգենտինայի մայրաքաղաքում գտնվող Թուրքիայի դեսպանատան մոտ հայկական համայնքը բողոքի ակցիա է արել։

Բրազիլիայում 22 000 հոգանոց հայկական սփյուռքը բողոքի ակցիաներով նույնպես միացել է ադրբեջանական ագրեսիայի դեմ բողոքի ցույցերին: Բրազիլիայի հայ համայնքը նույնպես կոչ է արել դադարեցնել Հայաստանի և Արցախի դեմ ուղղված Ադրբեջանի և Թուրքիայի ագրեսիան: 

Հույների և հայերի խոշոր ցույց է կազմակերպվել Հունաստանի Սալոնիկ քաղաքի կենտրոնում։ Ակցիային մասնակցել են մի քանի հարյուր հույներ ու հայեր, որոնք ազգային դրոշներով անցել են քաղաքի կենտրոնով, մոմեր վառել ու աղոթք բարձրացրել առ Աստված։  

Այս թեմայով Հայաստանը պատրաստ է Թուրքիայի հետ հարաբերությունների լիակատար կարգավորմանը. Կոստանյան Հայաստան են ժամանել նաև Բելառուսի և Ղազախստանի վարչապետները ՍԴ-ն ուղղակի ամրագրել է, որ ՀՀ-ն հրաժարվում է Արցախյան հարցից. Գոհար Մելոյան Գեղասահորդներ Ակոպովան և Ռախմանինը խոսել են Հայաստան տեղափոխվելու ծրագրի մասին ԵԱՏՄ-ում պատրաստ են կրկին քննարկել ծխախոտի անդեմ տուփերի վերաբերյալ Հայաստանի առաջարկները