Կոչ եմ անում Թրամփի վարչակազմին դիվանագիտական միջոցներ ձեռնարկել՝ տարածաշրջանում խաղաղություն հաստատելու համար. Լոս Անջելեսի քաղաքապետ

Միացյալ Նահանգները պետք է անհապաղ քայլեր ձեռնարկի՝ կանգնեցնելու Ադրբեջանի բռնի ներխուժումն Արցախի Հանրապետության տարածք: Այս մասին հայտարարել են Լոս Անջելեսի քաղաքապետարանում կայացած ասուլիսի մասնակիցները:

Ներկա կոնգրեսականներն ու ամերիկացի այլ գործիչներ կոչ են արել ԱՄՆ վարչակազմին նաեւ դատապարտել Թուրքիայի նախագահ Էրդողանին՝ հակամարտության գոտի սիրիացի եւ լիբիացի ահաբեկիչներ ուղարկելու համար: 

Ելույթով հանդես է եկել  նաև Լոս Անջելեսի քաղաքապետ Էրիկ Գարսետին, ով նշել է.

«Այսօր միասնության և համերաշխության օր է, երբ պետք է կարևորվեն մեր գործողությունները: Կյանքեր են կորսվել Արցախի քաղաքներում և համայնքներում տեղի ունեցող ներխուժումների հետևանքով: Խաղաղության կոչերը չեն կարող ոչինչ փոխել, միայն գործողությունները: Այս պահին մեր առաքելությունը պետք է հստակ լինի, այն է գործնական քայլերի անցնել: Կոչ եմ անում Թրամփի վարչակազմին դիվանագիտական միջոցներ ձեռնարկել՝ տարածաշրջանում խաղաղություն հաստատելու համար: Դա պետք է սկսվի ադրբեջանական անգրեսիայի վճռական դատապարտմամբ և պահանջով, որ Թուրքիան անհապաղ դուրս գա հակամարտությունից»: