Ֆրանսիան մտահոգություն է հայտնում

Ըստ Ֆրանսիայի ԱԳՆ-ի տարածած հաղորդագրության` Ֆրանսիան ևս անհանգստություն է հայտնել օգոստոսի 31-ին Ադրբեջանի իշխանությունների կողմից Ռամիլ Սաֆարովին ներման արժանացնելու փաստի առնչությամբ, ով 2004թ. Բուդապեշտում հայ սպայի էր սպանել: 

Ֆրանսիան, ինչպես և Լեռնային Ղարաբաղի հակամարտության խաղաղ կարգավորման գործոնթացում խորապես ներգրավված Մինսկի  մյուս համանախագահները, համարում է, որ այս որոշումը կարող է լրջորեն վնասել բանակցային ջանքերին և կողմերի միջև վստահության մթնոլորտի հաստատմանը:

Հիշեցնենք, որ 2004 թվականի փետրվարի 19-ին Բուդապեշտում ադրբեջանցի ոճրագործ սպա Ռամիլ Սաֆարովը կացնահարեց Հայաստանի ԶՈւ սպա Գուրգեն Մարգարյանին քնած ժամանակ: Սպաները Հունգարիայի մայրաքաղաքում մասնակցում էին անգլերեն լեզվի դասընթացներին ՆԱՏՕ-ի «Գործընկերություն հանուն խաղաղության» (Peace for Partnership) ծրագրի շրջանակներում: Հունգարիայի դատարանը դատապարտեց Ռամիլ Սաֆարովին ցմահ բանտարկության առանց ներման իրավունքի առաջին 30 տարիներին: Ադրբեջանի «հերոս» ճանաչված մարդասպանն արժանացել է նաև մայորի կոչման, բնակարանի ու նյութական փոխհատուցման: