Ռուբեն Հայրապետյանին սնանկացումից փրկելու փո՞րձ

Այսօր լուրեր տարածվեցին այն մասին, որ Երևանի քաղաքապետարանի ենթակայության տակ գտնվող պոլիկլինիկաներին ստիպում են խզել պայմանագրերը նախկինում սպասարկող բանկի հետ և պայմանագիր կնքել ԱԺ ՀՀԿ-ական պատգամավոր Ռուբեն Հայրապետյանին պատկանող Հայկական զարգացման բանկի հետ: 

Ըստ նույն աղբյուրների` Երևանի թիվ 17 պոլիկլինիկայի աշխատակիցները բողոքում են բանկի ծառայություններից և փորձում փոխել այն, սակայն պարզվել է, որ դա անհնար է առանց քաղաքապետարանից եկող հրահանգի։

Lurer.com-ը կապ հաստատեց նշված պոլիկլինիկայի տնօրենի հետ, ով մեզ հետ զրույցում հերքեց տարածված ինֆորմացիան։

«Չէ’, այդպիսի խնդիր չկա և չի էլ եղել։ Մենք աշխատում ենք Հայկական զարգացման բանկի հետ, որովհետև նրանց պայմաններն են մեզ համար նպաստավոր, մեզ ոչ ոք ո’չ ստիպում է, ո’չ՝ պարտադրում»։

Իսկ այն հարցին, թե ինչու են իր աշխատակիցները բողոքով հանդես եկել, տնօրենը պատասխանեց. «Նման բան չէր կարող լինել, և ես երևի շտապեմ հերքել դա...Բանկի հետ պայմանագիրը կնքում ենք` ելնելով նրանց առաջարկած պայմաններից։ Եթե պայմանները նպատակահարմար ենք գտնում, այդ դեպքում պայմանագիր կնքում ենք»-հավելեց վերջինս։

Այստեղից հարց է առաջանում՝ իսկապես չի եղել պարտադրանք, թե տնօրենի հերքումը ընդամենը «աշխատանքային աթոռը» չկորցնելուն ուղղված քայլ էր։

Իսկ ինչ վերաբերում է ADB-ին, այն  հայաստանյան բանկային համակարգի հետնապահներից է և ունի շատ քիչ թվով մասնաճյուղեր։ Այս պարագայում առնվազն կասկածելի է այս բանկի պայմանների նպաստավոր լինելու տեսակետը։

Նելլի Ավետիսյան