Սոֆի Մխեյան. «Տա Աստված՝ սիրահարվեմ» (լուսանկարներ)

Lurer.com-ի զրուցակիցն է երգչուհի Սոֆի Մխեյանը:

Սոֆի, այս տարի Մխեյանների ընտանիքը առանց Ձեզ է կարծես թե հանգստացել:

-Ընտանիքիս անդամները դեռ չեն էլ հասցրել հանգստանալ. մեր բնակարանի վերանորոգմամաբ էին զբաղված: Միայն ես և եղբայրս այդ իրարանցման ընթացքում կարողացանք կազմակերպել մեր հանգիստը: Հուսով եմ՝ դեռ կհասցնեմ ընտանիքիս հետ էլ որևէ հետաքրքիր հանգիստ կազմակերպել:

Լուսանկարներից երևում է, որ ակտիվ և էքստրեմալ հանգիստ եք վայելել Ավետի, Նազենիի և Անդրեի հետ:

-Այո՛, լուսանկարները գուցե ավելի պատկերավոր ներկայացնեն այդ ամենը. դժվար է փոխանցել այն էմոցիաներն ու դրական լիցքերը, որ մի շաբաթում հասցրեցինք ստանալ: Ասեմ, որ մեծ դժվարությամբ կարողացանք Ավետին համոզել առագաստանավակը միայնակ վարել: Իսկ երբ մեզ դա հաջողվեց,նա ուղղակի ցնցված էր ու որքան շնորհակալ էր, որ ստիպեցինք իրեն դա անել: Լաստանավով պտույտները, ծովի մեջտեղում լողալը..չգիտեմ.. հրաշալի օրեր անցկացրինք Մոնտենեգրոյում:

Հետաքրքիր է՝ այսքան երկար տարիներ նույն բնագավառում աշխատելով, այս քառյակին միայն վերջերս ենք հաճախակի միասին տեսում: Ինչը՞ ավելի մտերմացրեց ձեզ:

- Այս տարի Յուրմալայում «Նոր ալիք» մրցույթի շրջանակներում մենք էինք ներկայացնում Հայաստանի պատվիրակությունը, ուստի միասին շատ ժամանակ էինք անցկացնում, ինչի արդյունքում հասկացանք, որ երբ չորսս մի վայրում ենք, չենք հասցնում ձանձրանալ, մթնոլորտն էլ ջերմանում է՝ անկախ ամեն ինչից: Հենց այս ուղևորության ընթացքում էլ միտք ծագեց որևէ տեղ միասին մեկնելու, հանգստանալու: Ու երբ վերադարձանք Հայաստան, որոշեցինք խոսքը օդում չթողնելով՝ այն իրականացնել: Ի դեպ, շատ արագ որոշեցինք ու մեկնեցինք:

Անկախ տարիքից, հայ ծնողները իրենց երեխաների հանդեպ շատ հետևողական են, երբեմն նաև արգելում են այս կամ այն բանը միայնակ անել, Ձեր դեպքում նման խնդիրներ չե՞ն եղել:

-Գիտեք, փոքր հասակում ևս շատ ակտիվ երեխա եմ եղել: Նույնիսկ հասցրել եմ մասնակցել տարբեր ճամբարների: Ծնողներս երբեք չեն արգելել որևէ բան անել: Ու այդ վստահությունը ես առ այսօր գնահատելով ՝ երբեք չեմ մոռանում չափի զգացողության մասին:

Աշունը նորություններ խոստանո՞ւմ է:

-Միանշանակ. սպասվում են նորություններ, բայց կոնկրետ տեսահոլովակի, ձայնասկավառակի, թե մենահամերգի տեսքով, դա թող մնա անակնկալ:

Աշուն... անձրև...մի տեսակ ռոմանտիկա կա եղանակի մեջ: Սիրահարվելու ցանկություն չունե՞ք:

-(Ժպտում է) Իհարկե, ցանկություն երբեմն լինում է, այն էլ նման զգացմունքային եղանակին: Բայց սա այն դեպքն է, երբ մեզնից ոչինչ կախված չէ. ցանկությունը կամ դառնում է իրականություն, կամ՝ ոչ: Ու տա Աստված, որ դառնա…:

Ռուբինա Հակոբյան

{gallery}sofi{/gallery}