Առաջին անգամ Երևանից դուրս հնարավոր է իրականացնել ինվազիվ բուժական միջամտություններ

Այսօր հանդիսավորությամբ բացվեց Գյումրիի նորակառույց բժշկական կենտրոնը։ Բացմանը մասնակցեց Հայաստանի Հանրապետության նախագահ Սերժ Սարգսյանը։ Նախագահը ՀՀ առողջապահության նախարար Դերենիկ Դումանյանի և հյուրերի հետ շրջեց կենտրոնի բաժանմունքներում, ծանոթացավ պայմաններին ու բժշկական սպասարկման հնարավորություններին։

Ողջունելով բացման մեծաթիվ մասնակիցներին, ՀՀ առողջարապության նախարար Դերենիկ Դումանյանն ասաց.

«Մեծարգո պարոն նախագահ, հարգելի հյուրեր,

սիրելի գյումրեցիներ,

այսօր նշանակալի օր է բոլորիս համար։ Անկախ Հայաստանի 21-ամյա պատմության ընթացքում առաջին անգամ իր դռներն է բացում պետական միջոցներով կառուցված բժշկական կատարյալ մի կենտրոն։ Այս նախաձեռնությունը Հայաստանի Հանրապետության նախագահ Սերժ Սարգսյանի նախընտրական ծրագրի՝ տարածքների համաչափ զարգացման դրույթի արտահայտությունն է։ Խորհրդանշական է, որ կենտրոնը շահագործվում է 1988-ի երկրաշարժի դժվարություններն ու անհարմարությունները երկար ժամանակ կրած Գյումրիում։

Սա խիստ ժամանակակից բազմապրոֆիլ բժշկական կենտրոն է՝ ախտորոշիչ հզոր հնարավորություններով, գերհագեցած վիրասրահներով, անհետաձգելի և ինտենսիվ բուժման, դիալիզի բարձրակարգ բաժանմունքներով, լաբորատոր բազմակողմանի ծառայությունով, ինչպես նաև մայրաքաղաքի և արտերկրի առաջատար կլինիկաների հետ հեռահաղորդակցային բժշկական խորհրդատվությունների իրականացման հնարավորությամբ:

Հարկ է նշել, որ կենտրոնում տեղադրված են ամենավերջին սերնդի մի շարք սարքավորումներ, որոնցից հատկարես ուզում եմ առանձնացնել համակարգչային սրտագրության սարքը և անգիոգրաֆը։ Անչափ կարևորում եմ վերջինի առկայությունը, որը հնարավորություն է տալիս առաջին անգամ մայրաքաղաքից դուրս իրականացնել ինչպես ախտորոշիչ, այնպես էլ ինվազիվ բուժական միջամտություններ, և տարածաշրջանի մեր ազգաբնակչությունն այսուհետև անհրաժեշտության դեպքում հնարավորություն կունենա սրտաբանական բարձրակարգ ծառայություն ստանալ տեղում։

Ամփոփելով, վստահաբար կարող եմ ասել, որ այսօր Գյումրիում իր դռներն է բացում այնպիսի մի կենտրոն, որի հագեցվածության ու պայմանների մասին պարզապես կերազեին մայրաքաղաքի շատ կլինիկաներ։ Ավելին՝ սա մի կենտրոն է, որ կարող է բավարարել աշխարհի զարգացած երկրների պահանջները։

Առիթից օգտվելով, ցանկանում եմ շնորհակալություն հայտնել բոլոր նրանց, ովքեր իրենց ներդրումն են ունեցել այս կենտրոնի ստեղծման գործում և հատկապես Համաշխահային բանկի մեր գործընկերներին՝ աջակցության և մշտապես ակտիվ համագործակցության համար։

Մեծարգո պարոն նախագահ,

Հիասքանչ այս կառույցի հարևանությամբ ձեր անմիջական հանձնարարությամբ այսօր իր դռներն է վերաբացում նաև ընդամենը երկու ամսում հիմնովին նորացված և հզորացած «Գյումրու մոր և մանկան ավստրիական հիվանդանոցը»։ Այստեղ այսուհետև կգործի նաև 30 մահճակալանոց մանկաբարձագինեկոլոգիական բաժանմունքը։

Ուզում եմ շնորհակալություն հայտնել ավստրիացի մեր գործընկերներին՝ հիվանդանոցին ժամանակակից բժշկական սարքավորումներ նվիրելու համար։

Կասկած չունեմ, որ այս կենտրոններում աշխատող մասնագետներն ու այցելուներն աչքի լույսի պես կպահպանեն այս ամենը։

Իսկ ՀՀ առողջապահության նախարարությունն իր հերթին անհրաժեշտ բոլոր միջոցները կձեռնարկի, որպեսզի հրաշալի այս բժշկական կենտրոնում աշխատեն բարձր պատրաստվածությամբ մասնագետներ և Հանրապետության նախագահի անմիջական աջակցությամբ ստեղծված կատարյալ այս պայմաններն արդյունավետորեն ծառայեցվեն Գյումրիի և Շիրակի մարզի ազգաբնակչության բժշկական սպասարկմանը։

Թույլ տվեք մեկ անգամ ևս շնորհավորել հրաշալի այս նորամուտի առիթով»։

Երկրի ղեկավարը, ՀՀ առողջապահության նախարարը հանդիսության մասնակիցների հետ եղան նաև «Գյումրու մոր և մանկան ավստրիական հիվանդանոցում», ծանոթացան կատարված աշխատանքներին, ստեղծված լավագույն պայմաններին։