Ես հպարտ եմ, որ այսպիսի թիմ ունեմ՝ ուժեղ, հզոր. ԱԻ նախարար

Սեպտեմբերի 4-ին նշվող ԱԻ աշխատակցի օրվա միջոցառումների շարքում Երևանի Մյասնիկյան 1 հասցեում տեղի ունեցավ թիվ 8 հրշեջ մասի վարչական շենքի բացման արարողությունը: Արարողությանը ներկա էին ՀՀ վարչապետ Տիգրան Սարգսյանը, ՀՀ Ազգային անվտանգության խորհրդի քարտուղար Արթուր Բաղդասարյանը, ԱԻ նախարար Արմեն Երիցյանը, Երևանի քաղաքապետ Տարոն Մարգարյանը, կառավարության անդամներ, ԱԻՆ աշխատակիցներ և բարձրաստիճան այլ հյուրեր:

Նոր շենքի տարածքն ու առանձնահատկություններն ուսումնասիրելուց հետո արարողության մասնակիցներն ուղևորվեցին ԱԻՆ շենքին հարակից մասնաշենք, որտեղ տեղի ունեցավ ՀՀ ԱԻՆ պոլիկլինիկայի պաշտոնական բացումը։ Պոլիկլինիկայի նպատակը նախարարության անձնակազմի, փրկարար ծառայողների, նրանց ընտանիքների և կենսաթոշակառուների բժշկական ապահովումն է:

Դրան հաջորդեց ցուցադրական ներկայացում՝ ԱԻՆ Ճգնաժամային կառավարման կենտրոնում (ՃԿԿ), որի ընթացքում ՃԿԿ-ի պետ Հովհաննես Խանգելդյանը հյուրերին ներկայացրեց կենտրոնի գործառույթները, հնարավորությունները, ինչպես նաև հրդեհային ավտոմատ վերահսկողության և գլոբալ տեղորոշման նոր (GPS) համակարգերը:

Տոնական միջոցառումները եզրափակվեցին հանդիսավոր նիստով։ Բացման խոսքում ԱԻ նախարար Ա. Երիցյանը մասնավորապես ասաց. «Իմ շատ սիրելի գործընկերներ, նախ ցանկանում եմ շնորհակալություն հայտնել ձեր բարի ու մարդասիրական առաքելության, ձեր նվիրված աշխատանքի համար: Ես հպարտ եմ ձեզանով, որ աշխարհի տարբեր երկրներում ամենաբարձր մակարդակով եք ներկայացնում Հայաստանը, որ անկախ դիրք ու պաշտոնից, անկախ կուսակցական պատկանելությունից, բոլոր կողմերից միայն դրական արձագանքներ ենք ստանում' հավանության ու երախտագիտության խոսքեր: Ես հպարտ եմ, որ այսպիսի թիմ ունեմ՝ ուժեղ, հզոր: Ես շնորհակալ եմ մեր երկրի ղեկավարությանը համակարգի նկատմամբ ցուցաբերած ուշադրության ու հոգատարության համար: Շնորհակալ եմ նախարարություն-գերատեսչությունների և միջազգային կազմակերպությունների իմ բոլոր գործընկերներին՝ արդյունավետ համագործակցության համար: Շնորհավորում եմ մեր բոլորի տոնը: Ցանկանում եմ ձեզ առաջին հերթին առողջություն ու անփորձանք աշխատանք, բարեկեցություն, խաղաղություն, սեր ու երջանկություն ձեր ընտանիքներին:

ՀՀ վարչապետ Տ. Սարգսյանն իր շնորհավորական խոսքն ուղղեց ԱԻՆ աշխատակիցներին. «ՀՀ կառավարության և իմ անունից շնորհավորում եմ ձեզ՝ ԱԻ աշխատակցի օրվա կապակցությամբ: Մաղթում եմ ձեզ նորանոր աշխատանքային հաջողություններ և առողջություն, որպեսզի նույն ջանասիրությամբ հարկ եղած ժամանակ օգնության ձեռք մեկնեք մեր քաղաքացիներին: Քանի որ մենք ապրում են սեյսմոակտիվ գոտում, փրկարարի մասնագիտությունը անհրաժեշտ է մեր հասարակության համար: Շնորհակալ եմ ձեզ՝ ձեր քրտնաջան և հերոսական աշխատանքի համար»:

Շնորհավորական ելույթով հանդես եկան նաև ՀՀ պաշտպանության նախարար Ս. Օհանյանը, ԱԱԽ քարտուղար Ա. Բաղդասարյանը, ՀՀ Ոստիկանության պետ, գեներալ-լեյտենանտ Վ. Գասպարյանը, ՀՀ արդարադատության նախարար Հ. Թովմասյանը, Երևանի քաղաքապետ Տ. Մարգարյանն ու այլ բարձրաստիճան պաշտոնատար անձիք: Նիստի ընթացքում ԱԻՆ 200-ից ավելի աշխատակիցներ ՀՀ վարչապետի, ԱԺ նախագահի, Ազգային անվտանգության խորհրդի և կառավարական այլ մարմինների կողմից պարգևատրվեցին պատվոգրերով, շնորհակալագրերով հուշամեդալներով և մեդալներով:

Տոնական միջոցառումների ավարտին ԱԻ նախարար Արմեն Երիցյանը լրագրողներին ասաց. «2008թ. ի վեր այս ոլորտում շատ աշխատանքներ են իրականացվել, բազմաթիվ նոր համակարգեր և տեխնիկական սարքավորումներ են տեղադրվել, ՃԿԿ-ի շնորհիվ բարձրացել են աշխատանքի արդյունավետությունն ու որակը: Այժմ ես վստահորեն կարող եմ նշել, որ մեր ՃԿԿ-ն տարածաշրջանում լավագույններից է և համապատասխանում է միջազգային բոլոր նորմերին: Բայց մենք ձեռք բերածով չենք սահմանափակվելու և դեռ շատ աշխատանքներ ենք իրականացնելու համակարգի կատարելագործման համար»: