ՀՀ-ում ՌԴ դեսպանությունը մեկնաբանել է դիվանագիտական ներկայացուցչության մոտ տեղի ունեցած ակցիան

ՀՀ-ում Ռուսաստանի դաշնության դեսպանատունը տարածել է հետեւյալ հաղորդագրությունը․

 

«Այսօր դիվանագիտական ներկայացուցչության մոտ տեղի ունեցած Լեռնային Ղարաբաղում պատերազմի անհապաղ դադարեցում պահանջող՝ հայ կանանց հավաքի հետ կապված՝ դեսպանատունը ստացել է մի շարք հարցումներ ԶԼՄ-ներից՝ տվյալ ակցիան մեկնաբանելու խնդրանքով:

 

Պատասխանում ենք միանգամից բոլորին.

 

Իսկապես, այդ միջոցառումն այսօր տեղի է ունեցել: Հավաքվածների ներկայացուցիչներին հանդիպեց Ռուսաստանի դեսպանը, ով խորը ցավակցություն հայտնեց իրենց որդիներին կորցրած բոլոր մայրերին: Դիվանագիտական առաքելության ղեկավարն ընդգծեց, որ հայ ու ադրբեջանցի ժողովրդի ողբերգությունը Ռուսաստանում ընկալում են իբրև իրենց սեփականը: Հենց այդ պատճառով մեր երկիրը հսկայական ջանքեր է ներդնում, որպեսզի ռազմական գործողություններն ավարտվեն ու վերականգնի բանակցային գործընթացը:

 

Ինչպես հայտնի է, վերջերս ժողովրդին ուղղված իր ուղերձում Հայաստանի վարչապետ Ն.Վ. Փաշինյանը հատուկ շնորհակալություն է հայտնել Ռուսաստանին ձեռնարկվող քայլերի համար: Դրանք մասնավորապես ուղղված են հակամարտության հետագա ընդարձակումը կասեցնելուն, որը սպառնալիք կդառնար խաղաղության համար ոչ միայն Հարավային Կովկասում, այլև դրա սահմաններից հեռու:

 

Այս կապակցությամբ կցանկանայինք ուշադրություն դարձնել պարադոքսալ մի հանգամանքի վրա:

 

Հավաքվածների կողմից հնչեցրած հակամարտությունն անհապաղ դադարեցնելու պահանջը, այն էլ՝ վերջնագրի ձևով, չգիտես ինչու հասցեագրված է հենց այն երկրին, որը ձեռնարկում է իրական, գործնական քայլեր այդ ուղղությամբ»,- ասված է ՌԴ դեսպանատան հաղորդագրության մեջ։