ՀՀ նախագահը՝ հատուկ հյուրի կարգավիճակով

ՀՀ նախագահ Սերժ Սարգսյանը հրավիրվել է մասնակցելու Եվրոպական ժողովրդական կուսակցության (ԵԺԿ) համագումարին՝ որպես հատուկ հյուր: Այս մասին ասվում ԵԺԿ մամլո հաղորդագրությունում:

Դեկտեմբերի 7-8-ն ԵԺԿ-ն Ֆրանսիայի Մարսել քաղաքում կանցկացնի իր 20-րդ համագումարը: Նախատեսվում է, որ համագումարին քննարկելու է «Տանել Եվրոպան առաջ» կոչվող փաստաթուղթը:

ԵԺԿ-ն կանցկացնի նաև պետությունների և կառավարությունների ղեկավարների իր հերթական գագաթնաժողովը, որի նպատակն է նախապատրաստվել Եվրախորհդի՝ դեկտեմբերի 9-ին կայանալիք նիստին: 

ԵՄ պետությունների ղեկավարներից ԵԺԿ համագումարին մասնակցում են Ֆրանսիայի նախագահ Նիկոլա Սարկոզին և Գերմանիայի կանցլեր Անգելա Մերկելը: Ներկա կլինեն նաև Եվրոպական հանձնաժողովի նախագահ Ժոզե Մանուել Բարոզոն և Եվրախորհրդարանի նախագահ Եժի Բուզեկը:

ԵԺԿ անդամակցող կուսակցությունների ղեկավարների թվում համագումարին կմասնակցի նաև Իտալիայի նախկին վարչապետ Սիլվիո Բեռլուսկոնին: Ի թիվս ԵՄ-ի անդամ չհանդիսացող պետությունների ղեկավարների՝ ԵԺԿ համագումարին կմասնակցի Վրաստանի նախագահ Միխայիլ Սահակաշվիլին:

Տեղեկացնենք, որ ԵԺԿ-ն համաեվրոպական խոշորագույն կուսակցությունն է, որը միավորում է քրիստոնեա-դեմոկրատական, պահպանողական ուղղվածության կուսակցություններին: Կուսակցության մեջ ընդգրկված են ԵՄ անդամ 26 երկրների և եվրոպական ևս 13 երկրների 72 կուսակցություններ: ԵԺԿ-ն այսօրվա դրությամբ եվրոպական կառույցներում ամենածանրակշիռ ներկայություն ունեցող կուսակցությունն է. Եվրոպական Հանձնաժողովում 27 պորտֆելներից 13-ը, ԵՄ խորհրդի 27 պորտֆելներից 17-ը պատկանում են ԵԺԿ-ին: Խորհրդարանական մարմիններում եւս ԵԺԿ-ն խոշորագույն խմբերն ունի. Եվրոպական Խորհրդարանում 736-ից 264-ը, իսկ ԵԽ Խորհրդարանական վեհաժողովում` 318-ից 203-ը:

Այսօր ԵՄ 14 եւ եվրոպական եւս 6 երկրներում ԵԺԿ անդամ կուսակցություններն իշխող են կամ ընդգրկված են իշխող կոալիցիաներում:

Հիշեցնենք, որ ԵԺԿ-ին անդամակցության հայտեր են ներկայացրել նաեւ հայաստանյան 4 կուսակցություններ. ՀՀԿ-ն, ԲՀԿ-ն, ՕԵԿ-ն ու «Ժառանգությունը»:

Նոյեմբերի վերջին փաստահավաք առաքելությամբ, Հայաստան էր ժամանել ԵԺԿ պատվիրակությունը` ԵԺԿ փոխնախագահ Եվրապառլամենտի պատգամավոր Քորիան Ուորթման-Կուլի գլխավորությամբ: Պատվիրակությունը հանդիպել է նշված 4 ուժերի ներկայացուցիչների հետ: