Մայքլ Ջեքսոն. ինքն իր մահվան պատճառ

ԱՄՆ-ում շարունակվում է Մայքլ Ջեքսոնի մահվան գործով դատավարությունը: Չկանխամտածված սպանության մեջ մեղադրվում է նրա անձնական բժիշկը: Դատախազները վերջին նիստի ժամանակ ցուցադրել են մի նկար, որում պատկերված է երգչի մերկ մարմինը` սպիտակ սավանի վրա, սեռական օրգանները փակված են սև քառակուսիով: Լուսանկարը հրապարակել է The Smoking Gun կայքը:

Նկարը որպես ապացույց ցուցադրվել է մեղադրող կողմի փաստաբանի ելույթի ժամանակ:

«Երգիչը 50 տարեկանում վատ ֆիզիկական վիճակում չի եղել, սակայն նրա մարմնի վրա հայտաբերվել են ներարկումների բազում հետքեր: Սիրտը, ըստ փորձագիտական եզրակացության, առողջ է եղել: Ըստ ամենայնի, սպանություն է տեղի ունեցել: Ջեքսոնը չէր կարող անձամբ ընդունել պրոպոֆոլի այն չափաբաժինը, որի արդյունքում նրա սիրտը կանգ է առել»,- ելույթում նշել է Ռոջերսը: Նա նշել է նաև, որ չի հավատում այն վարկածին, իբր երգիչը պրոպոֆոլ հասցրել է ընդունել 2 րոպեում, երբ Մյուրեյը սենյակում չի եղել:

Մեղադրող կողմը նշել է նաև, որ Մյուրեյը իր մոտ չի ունեցել համապատասխան բժշկական սարքավորումներ, որպեսզի Ջեքսոնին ներարկի անվտանգ չափաբաժնով դեղամիջոց: «Բժիշկը հանգիստ կարող էր սխալվել չափաբաժնի մեջ և ներարկեր ավելի շատ քանակությամբ պրոպոֆոլ»,- նշել է Ռոջերսը:

Դատարանում լսվել է նաև Մյուրեյի ցուցմունքի ձայնագրությունը, որտեղ բժիշկը առաջին անգամ խոստովանում է, որ վերջին 2 ամիսների ընթացքում երգչին գրեթե ամեն օր պրոպոֆոլ է տվել: Ջեքսոնն ինքն է աղաչել բժիշկին տալ քնաբեր, որովհետև տառապել է անքնությամբ, իսկ նրան թարմ ուժեր էին հարկավոր փորձերի և բեմ վերադառնալու համար: Ընդ որում, ձայնագրությունում Մյուրեյը նշում է, որ դեպքի գիշերը երկու րոպեով զուգարան է գնացել, իսկ վերադառնալուց տեսել է, որ Ջեքսոնն այլևս չի շնչում:

«Ես սիրում էի Ջեքսոնին: Նա իմ ընկերն էր: Ես ուզում էի օգնել նրան»,- ասել է Մյուրեյը: