The Guardian. ՄԱԿ-ը արձանագրել է Սիրիան լքողների ռեկորդային քանակ

ՄԱԿ-ի փախստականների հարցերով գործակալությունը հաղորդել է Սիրիայում մոլեգնող բռնություններից փախուստի դիմողների քանակի աննախադեպ աճի մասին այն բանից հետո, երբ օգոստոսին ավելի քան 100000 քաղաքացի փորձ կատարեց ապաստան գտնել Սիրիայի հարևան պետություններում։ Սրա հետևանքով սիրիական փախստականների թիվը հասել է 235.300-ի։

ՄԱԿ-ի փախստականների հարցերով գործակալության գլխավոր խոսնակ Մելիսա Ֆլեմինգը նշում է, որ փախստականների քանակի աննախադեպ աճը ցույց է տալիս, որ երկրի ներսում տիրում է վտանգավոր իրավիճակ, և բռնությունները շարունակվում են։

Սրա հետևանքով ՄԱԿ-ի համապատասխան գործակալությունները ստիպված կլինեն վերանայել փախստականների օգնության  համար նախատեսված գումարի չափը։

Սիրիայի հարևան երկրներից Իրաքում ներկայումս նկատվում է սիրիական քրդերի մեծ ներհոսք. շուրջ 500 սիրիացի է օրեկան հատում սահմանը։

Հորդանանում, որտեղ արդեն կա ավելի քան 77000 փախստական, ևս նման իրավիճակ է տիրում. այստեղ ժամանում է  օրական միջինում 1000 սիրիացի։

Թուրքիայում փախստականների թիվը հասել է 80.000-ի։ Թուրքական կառավարությունը հայտնում է, որ քայլեր է ձեռնարկում, որպեսզի կոնֆլիկտի թեժացման դեպքում ի վիճակի լինի ընդունել 150.000 փախստական։

Այս շաբաթ ՄԱԿ-ի փախստականների հարցերով գործակալությունը պատրաստվում է կազմակերպել շարժական գրանցման կենտրոն՝ արփձագանելով տեղահանված սիրիացիների աճող քանակի պայմաններին։