Իրաքը ցանկանում է Հայաստանում դեսպանատուն բացել

ՏԿՆ հասարակայնության հետ կապերի բաժնից տեղեկացնում են, որ ՀՀ փոխվարչապետ, տարածքային կառավարման նախարար Արմեն Գևորգյանը սեպտեմբերի 5-ին ընդունել է Իրաքի փոխվարչապետ Ռոզ Նուրի Շաուեյսի գլխավորած պատվիրակությանը:

Փոխվարչապետը ողջունել է հյուրերին՝ այցը կարևորելով երկկողմ հարաբերությունների ակտիվացման և երկու բարեկամ ժողովուրդների միջև կապերի խորացման տեսանկյունից: Գեւորգյանը նշել է, որ Հայաստանը պատրաստակամ է Իրաքի հետ համագործակցել բոլոր ոլորտներում: Նա հույս է հայտնել, որ հյուրերը հնարավորություն կունենան ծանոթանալ Հայաստանի արտադրական կարողություններին և հանդիպումների ու քննարկումների ընթացքում կնախանշեն երկու երկրների փոխգործակցության ուղղությունները: Փոխվարչապետը գործակցության համար հեռանկարային է համարել մասնավորապես շինարարության, սննդամթերքի վերամշակման, էներգետիկայի, առողջապահության, գիտակրթական ոլորտները: Գևորգյանը հյուրերին նաև տեղեկություններ է ներկայացրել ենթակառուցվածքների ոլորտում Հայաստանում իրականացվող խոշոր ծրագրերի մասին:

Իրաքի փոխվարչապետն իր հերթին ավելացրել է, որ իր երկիրը մեծ կարևորություն է տալիս բարեկամ Հայաստանի հետ կապերի խորացմանը: Նա տեղեկացրել է, որ իր պատվիրակության կազմում են նաև ենթակառուցվածքային ոլորտները ներկայացնող նախարարներ, ովքեր հայ գործընկերների հետ պատրաստ են քննարկել գործակցության հեռանկարները: Իրաքյան կողմը մասնավորապես հետաքրքիր է համարում համագործակցությունը էներգետիկ, ներդրումային, առողջապահական, գիտակրթական ոլորտներում: Հյուրը նաև հայտնել է Հայաստանում դեսպանատուն բացելու իր երկրի մտադրության մասին:

Գևորգյանը ողջունել է այդ մտադրությունը՝ նկատելով, որ դա նոր թափ կհաղորդի երկկողմ հարաբերությունների զարգացմանը: Նա նաև կարևորել է երկու երկրների միջև իրավապայմանագրային դաշտի ձևավորումը:

Երկուստեք կարևորվել է գործարար շփումների ակտիվացումը, որոնց պատրաստակամ կլինեն աջակցել կառավարությունները:

Զրուցակիցներն ընդգծել են նաև Իրաքի հայ համայնքի դերը երկկողմ հարաբերությունների ամրապնդման գործում: