Հայ մշակույթի օրեր Բուլղարիայում

Ս.թ. սեպտեմբերի 1-5-ը Բուլղարիայում տեղի ունեցան Հայ մշակույթի օրեր, որոնց պաշտոնական բացման արարողությանը մասնակցեցին ՀՀ մշակույթի նախարար Հասմիկ Պողոսյանը և իր գլխավորած պատվիրակությունը:

Մշակույթի օրերի շրջանակում սեպտեմբերի 1-ին Պլովդիվ քաղաքի ամառային թատրոնում ելույթ ունեցան Հայաստանի ֆիհլարմոնիայի ժողովրդական գործիքների և «Բարեկամություն» պարարվեստի պետական համույթները:

Սոֆիայի կինոյի տանը սեպտեմբերի 2-ին ցուցադրվեց կինոռեժիսյոր Վիգեն Չալդրանյանի «Ձայն բարբառոյ…» խաղարկային կինոնկարը: Սեպտեմբերի 3-ին Սոֆիայի Ազգային օպերային թատրոնում մեծ գալա համերգով իրենց արվեստը ցուցադրեցին հայ արվեստի գործիչները:

Համերգին ներկա էին ՀՀ մշակույթի նախարար Հասմիկ Պողոսյանը, ԲՀ մշակույթի փոխնախարար Միտկո Տոդորովը, Բուլղարիայում ՀՀ արտակարգ և լիազոր դեսպան Արսեն Սհոյանը, բարձրաստիճան հյուրեր, դիվանագիտական առաքելությունների ղեկավարներ, տեղի հայ համայնքի բազմաթիվ ներկայացուցիչներ:

Սեպտեմբերի 4-ն «Սբ.Կիրիլ և Մեթոդիի» անվան ազգային գրադարանում բացվեց «Երևանը ՅՈՒՆԵՍԿՕ-ի կողմից հռչակված 2012թ. գրքի համաշխարհային մայրաքաղաք և հայ գրատպության 500-ամյակը» խորագրով հայ հնատիպ գրքերի ցուցահանդեսը, որտեղ և տեղի ունեցավ «Մարկո Կրալ» էպոսի հայերեն և Լևոն Շանթի «Կայսր» պատմական դրամայի բուլղարերեն հրատարակությունների շնորհանդեսը:

Միջոցառմանը ողջույնի խոսքով հանդես եկավ Բուլղարիայի Հանրապետության փոխնախագահ Մարգարիտա Պոպովան, ով իր ելույթում նշեց հայ գրականության համար գրատպության գյուտի նշանակությունը և կարևորեց բուլղարական բազմաթիվ գրքերի և ամսագրերի հրատարակումը Կոստանդնուպոլսի հայկական տպարաններում: Ելույթներով հանդես եկան ՀՀ մշակույթի նախարար Հասմիկ Պողոսյանը, Բուլղարիայի Հանրապետության փոխնախարար Միտկո Տոդորովը, Բուլղարիայում ՀՀ արտակարգ և լիազոր դեսպան Արսեն Սհոյանը, Հայաստանի և Բուլղարիայի ազգային գրադարանների տնօրեններ Բորյանա Խրիստովան և Տիգրան Զարգարյանը: