Մանվել Գրիգորյան. Եթե ոսոխը շշկռվի, ռազմական գործողությունները բուն Ադրբեջանի տարածք կտեղափոխենք

Ազերի Ռամիլ Սաֆարովին Ադրբեջան արտահանձնելու և նրան ներում շնորհելու փաստի կապակցությամբ փոքրիկ հարցազրույց ենք ունեցել ԵԿՄ վարչության նախագահ, Արցախի հերոս Մանվել Գրիգորյանի հետ:

- Պարո՛ն Գրիգորյան, ինչպե՞ս եք գնահատում քնած հայ սպային կացնահարած ոճրագործի՝ Ադրբեջանին արտահանձնման և նրան ներում շնորհելու փաստը:

- Նախ՝ Իլհամ Ալիևը մի ավելորդ անգամ ապացուցեց, որ Արցախը չի կարող լինել Ադրբեջանի կազմում: Ինչպե՞ս կարող է Արցախը, արցախցին խաղաղ ապրել Ադրբեջանի կազմում, եթե այդ երկիրը Եվրոպայի սրտում պետականորեն կազմակերպում է հայի սպանություն: Մենք էն գլխից էլ գիտեինք, բայց իրեն քաղաքակիրթ համարող մարդկությունը, եթե մինչ այսօր չէր հասկացել, թող հիմա գոնե հասկանա, որ թուրքը թուրք է նաև 21-րդ դարում, թուրքը չի փոխվել, չի քաղաքակրթվել: Ու թող երևույթներին գնահատական տալիս ոչ թե արհեստական հավասարության նշան դնեն, այլ արդար մոտեցում ցուցաբերեն:

- Ի՞նչ եք առաջարկում ուրեմն. հրաժարվե՞նք Մինսկի խմբում բանակցային գործընթացից:

- Ո՛չ: Հրաժարվել պետք չէ: Պետք է ուղղակի աշխարհին հասկացնել, որ Ադրբեջանի իշխանության համար բանակցությունները իմիտացիա են: Նրանք փափուկ բարձ են դնում աշխարհի գլխի տակ, իսկ ծածուկ իրենց գործն են անում՝ դիպուկահարների սադրիչ գործողություններ, քնած հայ սպայի սպանություն եւ այլն: Մենք պետք է բանակցային գործընթացին մասնակցելուց բացի նաև ցանկացած պահի պատրաստ լինենք պատերազմի: Նաև աշխարհին պետք է բացատրենք, որ չկա արցախցու համար խաղաղության այլ իրական երաշխիք, քան ազատագրված տարածքներն են, որոնց հանձնումը դիրքային առավելություն կտա թուրք ազերուն: Նաև ողջ աշխարհը պետք է հասկանա, որ չկա Արցախի համար կարգավիճակ Ադրբեջանի կազմում: Ով նման պահանջ կներկայացնի, նա ոճրագործ է, նա ռամիլսաֆարովների հովանավորն է:

- Իսկ առավելապաշտական նման դիրքրոշումը չի՞ հանգեցնի իրավիճակի սրման, ռազմական գործողությունների վերսկսման:

- Ճիշտ հակառակը: Մենք քրիստոնյա ենք և խաղաղասեր: Այդ Ադրբեջանն էր, որ արցախցու խաղաղ պահանջներին Սումգայիթի եւ Բաքվի ջարդեր հակադրեց, որ պատերազմ սկսեց: Իսկ մենք մեզ պատերազմ պարտադրած թուրքին խաղաղություն պարտադրեցինք: Երկրապահից լավ ոչ ոք չի հասկանում խաղաղության գինը: Մենք ընկերներ ենք կորցրել, եղբայրներ, մեր ընկերների արյամբ ազատագրել ենք տարածքներ: Հանուն խաղաղության այդ տարածքները չենք հանձնելու, որովհետև, ինչպես արդեն ասացի, եթե Ադրբեջանը դիրքային առավելություն ստանա, չի խորշի ռազմական գործողությունների վերսկսումից: Չէ՞ որ եթե մեր հերոսը սպարապետ Վազգեն Սարգսյանն է, եթե մեր հերոսը արցախյան պատերազմում հաղթանակած զինվորն է, ռազմատենչ թշնամուն խաղաղություն պարտադրած զինվորը, ապա Ադրբեջանի հերոսը նա է, ում համարձակությունը բավականացնում է քնած մարդ կացնահարելուն:

- Իսկ հայկական բանակի բարոյահոգեբանական վիճակը այսօր բավարա՞ր է պատերազմ մղելու համար, անհրաժեշտության դեպքում մարտական գործողություններին կմասնակցե՞ն պահեստազորայինները:

- Ես կարող եմ բոլոր պահեստազորայինների անունից երաշխավորել, որ անհրաժեշտության դեպքում լինելու ենք առաջին դիրքերում: Ես նաև մեզ չեմ տարանջատում հայոց բանակից: Գեներալը, սպան նախկին չեն լինում: Հայ ազգը միասնաբար պատրաստ է հրաշքներ գործել, իսկ որ հայրենիքը պաշտպանել կարող ենք, որ ռազմամոլ ադրբեջանցուն հաղթել կարող ենք, արդեն ապացուցել ենք: Եթե ոսոխը շշկռվի եւ պատերազմ սկսի, ռազմական գործողություններն արդեն բուն Ադրբեջանի տարածք կտեղափոխենք:

Գոհար Վեզիրյան