Թուրքիայում զինամթերքի պահեստում տեղի ունեցած պայթյունի հետևանքով զոհվել է 25 մարդ

Թուրքական բանակի առնվազն 25 զինծառայող է զոհվել երկրի կենտրոնական մասում գտնվող Աֆյոն գավառում զինամթերքի պահեստում տեղի ունեցած պայթյունի հետևանքով, այս մասին հինգշաբթի օրը հաղորդում է Թուրքիայի զինված ուժերի գլխավոր շտաբը։ Նախկինում հաղորդվում էր 20 զոհերի մասին։

Պայթյունը տեղի է ունեցել չորեքշաբթի օրը՝ երեկոյան, այն պահեստում, որտեղ պահվում էին ռազմական նռնակներ։ Պատահարի պատճառները պարզվում են։ Նշվում է, որ պայթյունն այնքան հզոր է եղել, որ այս տարածքի մի շարք տներում կոտրվել են պատուհանի ապակիները, տեղի բնակիչները խուճապահար դուրս են վազել փողոց, կարծելով որ երկրաշարժ է տեղի ունեցել։ Գավառի իշանությունները հայտարարել են, որ զինանոցի պայթյունի պատճառը ահաբեկչությունը կամ դիվերսիան չէ։ Նրանք նաև տեղի բնակիչներին կոչ են արել չմոտենալ դեպքի վայրին, քանի որ այնտեղ ընկել են չպայթած նռնակներ։