Թուրքիայի ԱԳՆ-ի հայտարարությունը Սաֆարովի արտահանձմնան հետ կապված

Թուրքիայի ԱԳՆ-ը հայտարարությամբ է հանդես եկել հունգարական իշխանությունների կողմից մարդասպան Ռամիլ Սաֆարովին Ադրբեջանին հանձնելու և Իլհամ Ալիևի կողմից նրան ներման արժանանացնելու վերաբերյալ:

«Թուրքիան ապշած է ԱՄՆ-ում հայկական համայնքի արձագանքից, որին նախորդել են արտահանձնումը Հունգարիայի կողմից, ապա Ռամիլ Սաֆարովին ներում շնորհելու Ադրբեջանի նախագահ Իլհամ Ալիևի որոշումը, ով դատապարտվել է ցմահ ազատազրկման հունգարական բանտում հայ սպա Գուրգեն Մարգարյաինին սպանելու համար»:

Թուրքական արտգործնախարարության կայքի փոխանցմամբ՝ Թուրքիայի ԱԳՆ մամուլի խոսնակը հայտարարել է, թե հիշյալ գործընթացի որևէ փուլի Թուրքիան որևէ կերպ չի խառնվել և զարմանքով է հետևում Հայկական սփյուռքի' Թուրքիային ուղղված մեղադրանքներին:

«Այնտեղի պնդումներով Թուրքիան թիրախ դարձրած նման ջանքերը դարձել են սովորություն ամեն հարցում Թուրքիայի դեմ գործելու և վատ նպատակ ունեցող շրջանակների կողմից Թուրքիային սևացնող քաղաքականության մասն են կազմում»,-ասել է Թուրքիայի ԱԳՆ մամուլի խոսնակը:

Հիշեցնենք, որ 2004 թվականի փետրվարի 19-ին Բուդապեշտում ադրբեջանցի ոճրագործ սպա Ռամիլ Սաֆարովը կացնահարեց Հայաստանի ԶՈւ սպա Գուրգեն Մարգարյանին քնած ժամանակ: Սպաները Հունգարիայի մայրաքաղաքում մասնակցում էին անգլերեն լեզվի դասընթացներին ՆԱՏՕ-ի «Գործընկերություն հանուն խաղաղության» (Peace for Partnership) ծրագրի շրջանակներում: Հունգարիայի դատարանը դատապարտեց Ռամիլ Սաֆարովին ցմահ բանտարկության առանց ներման իրավունքի առաջին 30 տարիներին: Ադրբեջանի «հերոս» ճանաչված մարդասպանն արժանացել է նաև մայորի կոչման, բնակարանի ու նյութական փոխհատուցման: