ՀՀ նախագահի եղբայրը բիզնես չունի

Սերժ Սարգսյանի եղբայրը՝ Սիրիայում ՀՀ նախկին դեսպան, այժմ հատուկ հանձնարարություններով դեսպան Լևոն Սարգսյանը պնդում է, որ բիզնես չունի և կապ չունի ՀՀ-ում գումարներ կորցրած սփյուռքահայ ներդրողների հետ:

Սիրիայում ՀՀ նախկին դեսպանը նաև հայտարարում է, թե սիրիահայերի համար ամեն ինչ արվում է, ու «եթե այդ երկրում քաղաքացիական պատերազմ է, ինչ կարող ենք անել մենք»:

Երեկ Լևոն Սարգսյանն ուղեկցում էր Իրաքի պատվիրակությանը ԱԺ-ում: Ստորև ներկայացնում ենք «ժամանակի» զրույցը Լևոն Սարգսյանի հետ:

-Պրն. Սարգսյան, որպես Սիրիայում ՀՀ նախկին դեսպան և այժմ հատուկ հանձնարարություններով դեսպան, բավարար համարու՞մ եք այն ջանքերը, որ կիրառվում են, երբ պետական միջամտություն չկա, «Արմավիան» դադարեցրել է չվերթները և սիրիահայերը, փաստորեն, կրակի բերանին են, այն դեպքում, երբ անընդհատ սփհուռքահայերին ասում ենք' եկեք Հայաստան, ներդրումներ արեք, և այլն:

-Իհարկե, մենք ասում ենք' եկեք Հայաստան և ասելու ենք, Հայաստանը յուրաքանչյուր հայի հայրենիքն է և ոչ միայն ներդրումների համար: Իհարկե, նաև ներդրումների իմաստով: Ինչ վերաբերում է թե համարյա պետական միջամտություն չկա, պետությունը չի աշխատում, ես բացարձակ համաձայն չեմ դրա հետ: Հայաստանի կառավարությունն իր բոլոր հնարավորություններյ օգտագործում է սիրիահայությանը օգտակար լինելու և օգնելու համար:

-Իսկ ի՞նչ է անում կառավարությունը, գոնե այս պահին կոնկրետ ոչինչ չի արվում:

-Թույլ տվեք շարունակել. «Արմավիան» չվերթները դադարեցրել է միայն այն պարզ պատճառով, որ Սիրիայի ազատ բանակը հայտարարել է որ սկսելու է խփել յուրաքանչյուր ինքնաթիռ անկախ տեսակից' լինի ռազմական, թե քաղաքացիական:

-Միգուցե պետությունը պետք է բանակցե՞ր, որ այդ ինքնաթիռներին հարված չլիներ: Հիմա ի՞նչ անենք, թողնենք այդ մարդիկ մեռնե՞ն այնտեղ:

-Ո'չ, մենք չենք թողնում, որ այդ մարդիկ մեռնեն, անընդհատ կապի մեջ են:

-Բայց արդեն թողել ենք, պրն. Սարգսյան արդեն մահանում են:

-Չենք թողել, ո՞վ է ասում Ձեզ:

-Օրերս մի հայ կին մահացավ, երեք հայ վիրավոր են:

-Այո, երեք հոգի վիրավոր են, մի կին մահացել էր: Ընդհանուր դա հայերի դեմ ուղղված բան չի եղել:

-Բայց ինչպե՞ս կարող էր հայերի դեմ ուղղված լիներ:

-Իսկ ինչու չէր կարող որ: Փառք Աստծո, առայժմ նման բան չկա, և ես հուսով եմ, որ հայերի դեմ ուղղված կոնկրետ քայլեր չեն լինելու:

-Սակայն ընդհանուր քայլերի համատեքստում հայերը զոհվում են: Դա է խնդիրը:

-Հայերն այդ երկրի քաղաքացիներն են, և մենք մեր բոլոր ջանքերը գործադրում ենք, որ կարողանանք օգտակար լինել և բավականին արդեն օգտակար ենք եղել: Մոտ երկու-երեք ամիս առաջ «Արմավիայի» չվերթները չկային, և ՀՀ կառավարության ջանքերի շնորհիվ է, որ վերականգնվել են, իսկ այս պահին Հայաստանում բավականին սիրիահայ երեխաներ կան: Մենք չենք կարող մեզ վրա այդ պատասխանատվություն վերցնել, ինքնաթիռներ ուղարկել, ու հանկարծ ինչ-որ մի բան պատահի:

-Եթե Հայաստանը պետական մակարդակով ինչ-որ քայլեր փորձեր անել, ինձ թվում է, շատ ավելի արդյունավետ կլիներ, և այդ մարդկանց անվտանգությունն ապահոված կլիներ:

-Ես Ձեզ հավատացնում եմ, որ բոլոր քայլերն արվում են...Այս պահին ես տեղեկություն ունեմ, որ արդեն առավոտից Հալեպում 50-70 զոհ է եղել: Ես չգիտեմ քանի հայեր են եղել: Եթե այդ երկրում քաղաքացիական պատերազմ է, ինչ կարող ենք անել մենք: Ինչ-որ հնարավոր է' մենք անում ենք այն, ինչ մեզանից կախված է:

-Ասել է, թե եթե Ազատ բանակը շարունակի հայտարարել, որ գնդակոծելու է ինքնաթիռները այդպես էլ չի՞ լինելու Սիրիայի հետ:

-Իսկ ինչու՞ չի լինելու, լինելու է, մենք ուղղակի այս պահին երևի մի քանի օր կհամբերենք, տեսնենք, ինչ է կարող է մարդիկ հայտարարեն, որ թույլ են տալիս քաղաքական ավիացիայի չվերթներ կատարել: Եթե դա չլինի, մենք աշխատում ենք այլ ճանապարհի վրա, և անպայման կօգնենք:

-Որպես հատուկ հանձնարարություններով դեսպան, ի՞նչ եք Դուք կոնկրետ անում:

-Ինչ-որ հանձնարարում է նախագահը և նախարարը:

-Պրն. Սարգսյան, այ Դուք խոսեցիք ներդրումների մասին, խրախուսու՞մ եք ներդրումները, սփյուռքահայերին ասում եք, որ գան ներդրումներ անեն:

-Ես չեմ խրախուսում, դա Հայաստանի պետական քաղաքականությունն է:

-Վերջին շրջանում կան դրսի ներդրողներ, որ ասում են, թե Ձեզ պայմանավորվածություն են ունեցել ու իրենց խաբել են Հայաստանում:

-Դուք էլ ասեք, ուրիշ բան չունեմ ասելու:

-Այդ մարդիկ կոնկրետ ասում են, որ Դուք հրավիրել եք, Ձեզ հետ պայմանավորվածություն է եղել և այստեղ միլիոնավոր դոլարներ են կորցրել:

-Այդ բանը ցանկացած մարդ կարող է ասել: Ես էդ մարդուն ո’չ հրավիրել եմ, ո’չ էդ մարդու հետ գործարքի մեջ եմ մտել:

-Այդ դեպքում ինչու՞ է Ձեր անունը շոշափվում և ոչ մեկ ուրիշի:

-Ինչու, մի քանի հոգու անուն էլ է տալիս:

-Դուք, օրինակ, կառուցապատող Վլադ Մանգասարյանին ճանաչու՞մ եք:

-Վաղուց, երբ ես դեռ Հալեպում գլխավոր հյուպատոս էի, ինքը Պետրոս Տեր-Պետրոսյանի գլխավորած պատվիրակության եկել էր Հալեպ և ծանոթացել էին:

-Իսկ գոնե հետևու՞մ եք, որ այդ դատական պրոցեսներում արդարությունը գործի:

-Ես կատարում եմ ծառայողական պարտականությունս: Ես ո’չ դատախազ եմ, ո’չ դատավոր, որ հետևեմ դատական պրոցեսներին:

-Ձեր հասցեին է մեղադրանք հնչում, ասում են' Դուք էլ փայաբաժին ունեք այդ բիզնեսներում:

-Թող ասեն, թող ապացուցեն: Ես դեսպան եղած ժամանակ, իհարկե, բավական մարդկանց խրախուսել եմ, և էդ մարդիկ կան, կարող եք իրենց հարցնել' ես փայաբաժին ունե՞մ իրենց հետ, թե՞ չէ:

-Ասում են' նույնիսկ բնակարաններ են նվիրել Ձեզ:

-Ու՞ր է, իմ բնակարանն իրե՞նք են նվիրել: Կասկածում եմ:

-Անդրադառնանք նախագահական ընտրություններին: Եթե Ձեր եղբայրը չընտրվի, Ձեր գործունեությունը, Ձեր բիզնեսը Հայաստանում կարծում եք վտանգվա՞ծ կլինի:

-Ի՞նչ բիզնես: Դուք պրովոկացիա՞ եք անում: Ես ասեցի' ես բիզնես չունեմ, պետական ծառայող եմ: Իսկ մինչև իմ եղբոր նախագահ լինելը ես եղել եմ պետական ծառայող, հիմա էլ պետական ծառայող եմ և դիվանագիտականբ ծառայության մասին օրենքով մինչև 67 տարեկան դառնալը կարող եմ աշխատել և պիտի աշխատեմ:

-Ասել է թե' անկախ ամեն ինչից շարունակելու՞ եք աշխատել:

-Իհարկե, 67 տարեկանում թոշակի կգնամ: