Ադրբեջանցի պրոֆեսոր. Ռամիլ Սաֆարովի հանձնումն ու ներումն անընդունելի էր

Ադրբեջանցի պրոֆեսոր, Ադրբեջանի Գիտությունների ակադեմիայի գիտաշխատող Ռահման Բադալովը kultura.az կայքում անդրադարձել է Ռամիլ Սաֆարովի հանձնմանն ու ներմանը, մասնավորապես նշելով՝ «Ռամիլ Սաֆարովի հանձնումը և ներում շնորհելը ընդունելի կլիներ այն դեպքում, եթե չլինեին Ադրբեջանի իշխանությունների հետագա քայլերը (կարմիր գորգը օդանավակայանում, զինվորական կոչման բարձրացումը և այլն)։ Փաստորեն ներումը վերածվել է վերակենդանացման, ինչը չափազանց անընդունելի է, քանի որ խոսքը հանցագործության մասին է, որը ապացուցվել էր դատավարության ընթացքում»։

Ադրբեջանցի պրոֆեսորը նաև նշել է, որ Ռամիլ Սաֆարովը ոչ միայն ուղղակի հանցագործություն է գործել, այլև անցել է սպայի պատվի և արժանապատվության սահմանը: Բոլոր ժամանակներում՝ նույնիսկ ամենահին, բոլոր բանակներում եղել են ռազմական էթիկայի որոշակի կանոններ, որոնց խախտումը համարվել է ամոթ։ Անհրաժեշտ է իրերը կոչել իրենց անուններով. կացնահարել քնած մարդուն, առավել ևս սպային, անհարիր է յուրաքանչյուր մարդու համար, և նման գործողությունը պահանջում է վճռական դատապարտում՝ անկախ այն հանգամանքներից, որոնցում այն կատարվել է։ Բադալովը նաև ընդգծել է, որ այս սկզբունքների խախտումը պետք է դատապարտվի ավելի կոշտ և որակվի որպես քրեական օրենսգրքի այս կամ այն դրույթի խախտում, քանի որ միայն արգելքը նման գործողությունների վրա թույլ կտա հասարակությանը չընկնել համատարած վայրիության և չարացման գիրկը։ Բադալովը նաև համոզմունք է հայտնել, որ Սաֆարովի պատմությունը և ադրբեջանական իշխանությունների չկշռադատված և հաճախ անմիտ գործողությունները (սրանք ամենափափուկ խոսքերն են, ըստ հեղինակի, որ կարելի է կիրառել այս պարագայում), մեծ վնաս են հասցրել մեր երկրի հեղինակությանը։ Ըստ նրա՝ Ադրբեջանն այս քայլով հետ է մղել ղարաբաղյան հակամարտության կարգավորումը, և որ հսկայական ջանքեր կպահանջվեն երկու կողմերին էլ ուժային հռետորությունից հետ պահելու համար. «Ես խոսում եմ ոչ այնքան ռազմական գործողությունների (նման բան չեմ կանխատեսում), որքան ահաբեկչական գործողությունների մասին։ Մեծ ջանքեր կպահանջվեն մեր՝ առողջ դատողություն ունեցող մարդկանցից, մանավանդ մտավորականներից, որպեսզի մենք աշխարհում ձեռք չբերենք բարոյական վտարանդիների համբավ։