Ալիևի օգնականը ոչ տեղին է համարել ՌԴ-ում իր դեսպանի հայտարարությունը ուղղաթիռի հետ կապված միջադեպի մասին

Ադրբեջանի նախագահի օգնական Հիքմեթ Հաջիևը հայտարարել է, որ Բաքվում անտեղի են համարում Մոսկվայում իրենց դեսպանի՝ Փոլադ Բյուլբյուլօղլուի հայտարարությունը Հայաստանի երկնքում խփված ռուսական Մի -24 ուղղաթիռի հետ կապված միջադեպի մասին: Ըստ AzerTAc-ի՝ Հաջիևը գործակալությանը ասել է, որ Բաքուն դեսպանության ներկայացուցչի մեկնաբանությունը համարում է «անտեղի» և հավելել, որ նման միջադեպը չի կարող փչացնել Ռուսաստանի և Ադրբեջանի հարաբերությունները: «Անընդունելի են Ռուսաստանում Ադրբեջանի դեսպանի հայտարարությունները։ Արտերկրում Ադրբեջանի դիվանագիտական ​​առաքելությունների ղեկավարները և այլ պաշտոնատար անձինք պետք է զերծ մնան կամայական հայտարարություններից, որոնք հակասում են երկրի պաշտոնական դիրքին և նախագահ Իլհամ Ալիևի վարած քաղաքականությանը»,-Հաջիևի խոսքերը մեջբերում է  AzerTAc գործակալությունը:

Հիշեցնենք, որ հինգշաբթի օրը կայացած առցանց ճեպազրույցի ժամանակ Փոլադ Բյուլբյուլօղլուն, մեկնաբանելով միջադեպը, ասել էր․ «Սա պատերազմ է, այստեղ ամեն ինչ կարող է պատահել»: Այս կապակցությամբ Ռուսաստանի արտգործնախարարությունը հայտարարել էր, որ գերատեսչությունը հույս է հայտնում, որ ադրբեջանական կողմը «այլևս իրեն ոչ մի երկիմաստ հայտարարություն թույլ չի տա ողբերգական միջադեպի հետ կապված»: Նախարարությունը նաև նշել է, որ ակնկալում է նախագահ Իլհամ Ալիևի հավաստիացումների շուտափույթ իրականացումը միջադեպը հետաքննելու համար: