Չինաստանը 127 մլրդ դոլար արժողությամբ մետրո կկառուցի

Չինական կառավարությունը հավանություն է տվել 127 մլրդ ԱՄՆ դոլար ընդհանուր արժողությամբ երկաթուղային 25 նոր նախագծերի իրականացմանը. հայտնում է China Daily-ն: Այդպիսով Չինաստանը մտադիր է ներդրումներ կատարել ենթակառուցվածքների զարգացման ուղղությամբ, որով փորձում է հաղթահարել տնտեսական ճգնաժամը:

Կառավարությունը հավանություն է տվել 18 քաղաքների նախագծերին: Դրա մեջ մտնում  է նաև Շանհայի մետրոյի երկու նոր ճյուղերի կառուցումը: Բացի այդ՝ միջքաղաքային արագընթաց ճանապարհները, ներառյալ մետրոպոլիտենը, կառուցվելու են այնպիսի գավառներում, ինչպիսիք են՝ Սյամին, Թայյուան և Լանչժոու:

Չինաստանի ղեկավարությունը կենտրոնանում է քաղաքներում ինչպես ստորգետնյա, այնպես էլ վերգետնյա երկաթուղային մայրուղիների երկարության կտրուկ բարձրացման վրա: Ենթադրվում է, որ մինչև 2020թ.-ը մետրոն կերկարի մոտ 4 անգամ՝ մինչև 7.000 կմ:

Չինաստանը մտադիր է ենթակառուցվածքների կառուցմամբ ամորտիզացնել տնտեսական ճգնաժամի հետևանքները: Նախորդ եռամսյակում չինական ՀՆԱ-ի մակարդակը նվազել էր մինչև 7.6%, իսկ տարվա կտրվածքով ենթադրվում է, որ ՀՆԱ-ի աճը կկազմի 7.5%: Նախորդ տարվա ՀՆԱ-ն կազմել էր 9.3%:

Նկատենք, որ երկրի կառավարությունը տնտեսական կարգավորման համար դեռ չի առաջարկել որևէ ծրագիր, ինչպես որ եղավ 2008թ.-ին: Այդ ժամանակ կառավարությունը տնտեսության մեջ ներդրել էր ավելի քան 4 տրլն. յուան, որը հիմնականում ուղղված էր ենթակառուցվածքների բարելավմանը: